Imphal, January 10 : Congress party laga Bharat Jodo Yatra, kuntu ke etu party laga former(poila laga) president Rahul Gandhi para lead kuribole asey etu tu Manipur laga dusra jaga para suru hobole asey.
Congress party para etu faisla tu BJP para chola Manipur sarkar para Wednesday (January 10) te Imphal laga ekta jaga para Bharat Jodo Nyay Yatra suru kuribole laga permission nidiya picheyte loisey.
Etu jankari dikina, senior Congress leader KC Venugopal para koisey : “ Amikhan para jankari paisey ki Manipur laga sarkar para Imphal laga Palace Ground te etu Yatra kuribole dibole laga request ke reject kuridisey.”
Aro koisey ki taikhan tu etu yatra Manipur para hey suru kuribo lagey. Tai para koisey ki etu Yatra tu Manipur te suru hobo, hoilebi Manipur laga dusra jaga para. Etu laga detail jankari tu picheyte janaidibo koisey.
Manipur laga sarkar para Sunday (January 14) te Imphal East district laga Hatta Kangjeibung jag ate Rahul Gandhi laga Bharat Jodo Nyay Yatra launch kuribole laga ground permission dibole inkaar kuridisey.
Manipur Congress president aro Senior Congress MLA Meghachandra kun para Wednesday(January 10) te Manipur Chief Minister N Biren Singh ke tailaga office te lok kurisey, tai para enaka koisey ki CM Biren Singh para taikhan ke janaisey ki tailaga sarkar para rajya laga kanoon aro beybosta laga situation ke saikina permission dibole paranai.
Meghachandra para Manipur sarkar laga jawab tu eman dukh kuridiya laga asey koikina koisey ki permission dibole inkar kuridiya picheyte, taikhan para etu yatra suru kora laga jaga tu Thoubal district laga Khongjom jaga laga ekta private jag ate bodli kuridisey.
All India Congress Committee (AICC) laga President Mallikarjun Kharge para etu Bharat Jodo Nyay Yatra flag off kuribole asey kuntu tu 14 rajya aro 85 district cover kora picheyte March 20 te khotom hobole asey.
Add Comment