Congress MLA Covid para morishe

Mumbai: Maharashtra Congress MLA Raosaheb Antapurkar toh hospital te COVID bemari nemite elaj kori thaka samai morishe koikena khobor para Saturday din te janaishe. Antapurkar toh 64 umer thakishe aro tai toh Friday rati Bombay Hospital te morishe koishe. Tai toh organ besi beya hoikena April 1 darik para ventilator te thakishe. Antapurkar toh Nanded district laga Deglurassembly constituency te tui(2) paar MLA thakishe. Party khan para koishe ke, tai khan laga legislator ke COVID-19 positive toh March 19 darik te thurishe aro etu samai tai ke Nanded hospital te admitted korikena thakishe, etu beche tai ke March 22 darik Bombay Hospital te loikena jaishe. March 28 darik te tai laga COVID-19 report toh negative thakishe, hoilebi tai ICU te thakishe, tai laga lungs aro kidneys sob beya hoikena thakishe, koikena khobor para janaishe. Raosaheb Antapurkar laga funeral service toho tai laga jokom bosti Antapur te loboli ase koishe. Tai laga profession toh engineer thakishe, hoilebi tai kam jarikena Congress party te join korishe aro 2009 saal te Deglur assembly polls te jaishe. Tai 2014 saal te harishe, hoilebi aro 2019 saal te ek seat para jetishe. Tai para jarikena jowa khan toh, tai maiki, ama aro tuita(2) sathi kora chokri aro chokra 1 jun ase. Maharashtra minister aro Congress leader Ashok Chavan aro Congress chief Nana Patole para tai mora oper te mon dukh howa janaishe. Jowa saal November moina te, Solapur district laga Mangalvedha constituency para NCP MLA, Bharat Bhalke be COVID bemari para morishe koishe.