Headlines

CS R.B. Thong bitorte AHoDs aro HoDs laga ahke meeting

September 13, 2018

KOHIMA, SEPTEMBER 13 : Sob Administrative Heads of Departments (AHoDs) aro Heads of Departments (HoDs) kan 12th September 2018 te meeting manaise. Etubi Secretariat Conference Hall, Kohima te. Etu meeting toh State Chief Secretary, R. Binchilo Thong, IAS laga Chairmanship bitorte ahke wala mana laga ase koise.

Etu meeting mana toh boila 20th July 2018 te meeting mana toh kinika manaise etu sabole aro janibole karne mana laga ase. Aro etu meeting time te bi State Sorkar laga alak-alak bhal kotha nemite manai kena thakise koise.

Nagaland Legislative Assembly laga Commissioner aro Secretary porabi AHoDs aro HoDs kan ke Assembly laga ki-ki jani kena rakhibole kuribi koi kena janaise.Aro Legislative Assembly te Business laga Rules kan kinika julabole kuri etu kan aro Questions aro Answers kan kinika bai aro thaki etu kan bi janaide thakise koise.

Etu NLA laga Commissioner aro Secretary porabi AHoDs aro HoDs kan bi 2-3 Supplementary notes kan nemite dayar hakibole lagi. Aro etu Supplementary Questions pora Minister nahuile Advisor kan ki-ki bi janaidebole kuribo lagi koi kena janaidese.

Etu meeting te bi TB Detector Machine toh Chief Secretary’s Welfare Fund pora kinnibole karne kotha manaise aro janaise. Etubi Tuberculosis (TB) bemar thaka manu kan nemite saidebole karne. Aro etu Machine toh Tobu, Mon District laga ke rakhibole kuribo algi koi kena janaise. Principal Director, Health & Family Welfare porabi CB-NAAT toh etu Tobu jaka te anedebole kura karne edia toh bemar manu kan nemite ekdam aram hobo. Kele tai kan Kohima aro Mokokchung jabole thaka edia toh neju jaka tehi jai kena bemar sabole bara hobo koi kena.

Tai bi etu Machine toh 9 Districts pura te ase. Khali Longleng aro Peren te hi nai koi kena janaise. Tai bi etu Machine toh ekta bhal wala machine chis ase aro etu pora dawai chamala (Drug resistance) kan kebi sabole karne julabole bari koise.

Etu Chief Secretary porabi Centrally Sponsored Schemes (CSS) kan laga kotha janaide thakise. Etu ke tai Hindi kotha hisabte botli huijua karne etu Scheme toh kuntoh Department aro kuntoh Group laga ase najana huijai koi kena.  Etu karne tai sob Departments kan ke etu Hindi kotha pora lekhe kena thaka kan sob English kotha te lekhe debole kuribi (Translate). Aro etu kotha English hisabte lekhedebole toh Additional Secretary RD, Anup Kimchi, IAS laga motub lobole kuribi koi kena janaise.