Nagaland ekta dangor point te ahi ase. Aji kali din te state economic growth aru development karone bisi kotha hunibo pai ase. Government aru private company khan bhi investment anibole ase, renewable energy, agro-processing, tourism aru skill development sector te. 2030 para Nagaland ke $10 billion economy banabo laga plan ase. Kintu, etu development te ekta dangor question uthabo lage: Nagaland laga traditional identity thakibo paribo?
Nagaland to tribal diversity karone olop alag ase. Alag-alag tribe thaki, sobor nijor nijor language, culture, dress aru system ase. Etu sob to Nagaland laga heart ase. Jodi modern development etya bisi fast aahi jai ase, etu karone Naga identity aste aste loss hoi jabole pare. Aji kali bacha khan bhi nijor language bhal para najane, culture ke interest para na dekhi, etu bhi dangor concern ase.
Kintu development aru tradition ke ek sath rakhibo paribo. Development hoile bhi, local culture ke respect di thakile, state pura bhal para grow kuribo pare. “Living Morung” project juntu traditional knowledge, craftwork aru storytelling ke revive kuribole kuri ase, etu ekta bhal direction ase. Etu nishina program dekhaise ke progress mane old system ke hatai diya nohoi, hoilebi purana aru notun ke milaikena future banai thaka laga ase.
Nagaland te tourism, handcraft, organic farming aru heritage based development kuribole bisi scope ase. Etu sector te investment anile notun job create hobo, local manu khan bhi nijor culture ke pride para bhal kuribo. Kohima te juntu B20 conference hobo, tate ₹4,500 crore pora besi investment proposal ahise. Etu energy, healthcare, agro-processing te anise. Kintu etu sob investment local manu aru rural area ke help kuribo lagibo. Naihole, ekta-ekta urban center he benefit pai jabole pare.
Youth khan karone future scope bisi ase. Nagaland laga young generation educated aru digital-savvy ase. Skill Development Mission juntu vocational training aru self-employment promote kuri ase, etu ekta bhal step ase. Government etya 5,000 para besi youth ke training dibo plan banai ase. Kintu, job opportunity local level te create na kurile, olop din para sob youth bahar jai jabole pare. IT sector, startup program, local entrepreneurship ke promote kura dangor need ase.
Infrastructure bhi important part ase, road, light, internet, water supply. Chakabama para Zunheboto highway construction, new sub-station aru solar power project juntu Hovukhu te suru hoise, sob etu indicate kuri ase ke government serious ase. Connectivity hoile he education, health, business sob thik para kam kuribo pare.
Development laga meaning to Khali poisa nahoi, etu hobo lifestyle change, education, health aru culture bachai kena rakha. Jodi Nagaland bhal para grow kuribo bisare, tate identity, tradition, heritage ke importance dibo lagibo. Ekta balance banai thakibo lage, modernity ke accept kuri kena, root ke na baori kena, etu state grow kuribo pare.
Nagaland hotai alag thaki ase karon tai force para change nohoi, tai smart para change loise. Aji bhi etu thinking hobo lage, change lobo, kintu nijor identity ke bachai kena rakhibo. Etu Nagaland laga rasta ase.
Add Comment