NEW DELHI, AUGUST 31 : Friday din Congress kan Narendra Modi Sorkar ke kotha pora hamla kurise. Etu ke dail daam besi huijua karne kele eman daam huise. Aro Modi Sorkar kan Dail nemite tax mange kena Rs. 11 lakh crore poisa gaamai ase koi kena janaide thakise.
Congress Chief kotha kura manu Randeep Singh Surjewala pora khobor te Modi Sorkar pora Tax besi manga karne hi etu dail daam toh Rocket akaas te jua nesena besi huijai ase. Etubi Petrol dail aro Diesel dail daam kan. Aro Modi sorkar kan etu dail nemite Tax mange kena Rs. 11 lakh crore poisa luide ase aro gaamai ase koi kena janaise.
Tai bi etu Petrol aro Diesel dail daam toh hutai besi uthe kena thaki. Etu pora public manu, middle class, kheti kam kura, transporter aro small aro medium business kura kan dukh bai ase. Huilebi tai kan sob ene dukh bai kena hi thaki ase koi kena janaise.
Tai bi etu dail daam utha toh BJP Party kan 2014 sal te Sorkar julabole kura bejete porahi 211.7 percent pora Petrol daam uthe kena ase. Aro 433.06 percent pora Diesel daam uthe kena ase koi kena janaise.
Huilebi etu Modi Sorkar kan dail kan tusera desh te bata toh besi komti pora bhekai kena bataide ase koi kena etu kotha kura manu Congress party laga pora janaise. Etubi 15 ta desh kan ke. Etu Petrol dail daam toh Rs. 78-Rs. 86 dak hisabte mange kena ase. Aro Diesel dail daam toh Rs. 70-Rs. 75 dak hisabte mange kena ase. Huilebi tusera 15 ta desh kan bhekai kena bata ke Rs. 34/litre Petrol dail laga daam de ase aro Diesel dail laga toh Rs. 37/litre hisabte 29 desh te bhekai kena bataide ase koi kena janaise.
Etu desh kan toh England, Australia, America, Malaysia aro Israel kan ase. Aro etu dail laga daam toh eneka Modi Sorkar pora chukai kena ami kan desh laga manu kan ke kheli ase koi kena janaise.
