‘Darr’ film picheyte Shah Rukh Khan aro Sunny Deol 16 years kotha koranai

New Delhi, July 17 : Sunny Deol aro Shah Rukh Khan duijun tu ‘Gadar 2’ laga success party te lok kurikina ekjun ekjun ke hug kurisey. Etu tu ekta bisi dangor moment asey kilemaney taikhan duijun tu ekjun ekjun ke kotha nukurikina 16 years hoijaisey. Enaka bi koi ki taikhan duijun tu Yash Chopra laga ‘Darr’ film te ekta scene kora homoitey bisi biya para jhagra kora picheyte ekdusra logotey kotha koranai. Etu film te Aditya Chopra assistant thakisey. Aro Sunny Deol aro Shah Rukh Khan para film khotom hobole agey laga sobsey important part te ekta action scene kuribole lagisey. Ekta nutun interview te, action director Tinu Verma para utu homoitey actually ki hoisiley etu koisey. Sob manu jani asey ki Shah Rukh Khan para etu movie te villain laga role kurisey aro Sunny Deol tu hero laga role kurisiley. Etu film te Juhi Chawla heroine thakisey. Film khotom hobole ageyte etu action scene kora tu yaad kurikina, Tinu para koisey, “Sunny para koisey tai amikey agey para attack kuribole naparibo kilemaney ami ekta navy  officer asey. Sunny para kuwa tu thik thakisey. Shah Rukh para koisey ki tai Shakti Kapoor, Prem Chopra, Gulshan Grover nohoi ki ami pichey para attack kuribo.” Mamla eman gorom hoijaisey ki Shah Rukh Khan tu ekdam manibole tayar thakanai aro hilibole mana kuridisey. Aro koisey ki last te Sunny Deol eman gusa uthi jaisey ki tailaga haath pocket te thakisey. Aro tai tailaga haath eman jur para push kurisey ki tailaga pant phatijaisey. Sob manu shock hoijaisey. Shah Rukh Khan bi tatey thaksiey. Aro etu picheyte shoot ke rokhaidibole koisey. Etu picheyte taikhan duijun ekdusra logotey kotha koranai. Olop homoi ageyte Sunny para etu ghotna te kotha kurikina koisey ki tai Shah Rukh Khan ke kotha nokora laga karon etu thakanai. Tai eney nijor ke dusra para dur kuriloisey aro tai manu khan ke eman lok bi nokorey.