August 11, 2026, 7:49 PM: Itu continue pani giri thaka para aru pani khan bishi jama hoboley nishina aru kunba nichey jaga khan aru komjur jaga khan tey pani bishi hoboley laga view tey, itu District Disaster Management Authority (DDMA), Dimapur para toh hoiley ekta public advisory issue kurishey, manu khan ke alert tey thakiboley urge kuri kena, aru lagi thaka precaution khan loboley koi kena.
Itu advisory toh hoiley, Deputy Commissioner & Chairman, DDMA Dimapur, Dr. Tinojongshi Chang, NCS para issue kurishey, itu public khan ke caution loboley janaishey, bhal para sai kena thakiboley kiba eneka disaster nishina hoboley dikhiley osor laga nala khan, aru alag pani thaka jaga khan tey.
Resident khan ke misa mishi para travel nakuriboley koishey, heavy pani gira laga homoi tey, particular para pani jama hoi kena thaka raasta khan aru flood hoi kena thaka area khan tey. Itu DDMA para manu khan ke flood hoa raasta khan, bishi pani bhorta thaka nala khan, culvert khan nahoilebi bishi jur para jai thaka pani khan tey theng para hobi gari para hobi par kuriboley manna kuri asey.
