Deepika Padukone aro Ranveer Singh para  first baccha ke duniya te welcome kurisey

New Delhi, September 08 : Deepika Padukone aro Ranveer Singh tu Bollywood town te nutun ama-baba asey. Etu mota maiki para Sunday din te, ekta social media post laga through para taikhan laga first baccha jonom huwa laga bari te announce kurisey. Taikhan duijun para milikina ekta post share kurisey kuntu te enaka likhikina thakisey. “Welcome baby girl. 8.09.2024. Deepika and Ranveer.” Deepika aro Ranveer para taikhan laga relationship tu 2013 te Ram Leela laga set te suru kurisiley aro 2018 te shaadi kurisey. Taikhan para etu saal laga first fale pregnancy laga announcement kurisiley. Deepika tu March 2025 tak maternity leave(baccha pa picheyte maiki khan kaam para chutti pa)  te thakibole asey. Etu khobor logotey close thaka ekta source para news portal ke koisey, “Deepika aro Ranveer tu taikhan laga jibon laga nutun chapter suru kuribole besabiri para intazar kuri asey aro taikhan laga baccha nimitey ekta jaga banabole busy asey. Etya, Deepika tu tai kaam para luwa break laga eke k paal enjoy kuri asey. Khobor pa hisap te, tailaga maternity leave tu aha saal laga March moina tak thakibole asey. Aro etu picheyte, tai logalog Amitabh Bachchan, Kamal Hassan aro Prabhas logotey Kalki laga second part laga shooting logotey busy hoijabo. Taikey etu saal laga Diwali homoitey release hobole thaka film ‘Singham Again’ te dikhibole asey. Deepika aro Ranveer duijun tu Bandra te ekta nutun alishan apartment te shift kuribole laga bi tayari kuri asey. Etu ghor tu Shah Rukh Khan laga ghor, Mannat laga next te hey asey aro samundar ke face korey.