New Delhi, February 15: Ahibole thaka Municipal Corporation of Delhi (MCD) laga mayor elections ageyte, Aam Admi Party (AAP) laga 3jun councillors para Saturday din te BJP join kurikina Arvind Kejriwal para party ke Delhi Assembly election hara picheyte aro ekta jhatka disey.
Etu councillors- Anita Basoya (Andrews Ganj jaga laga), Nikhil Chaprana (Hari Nagar) aro Dharamvir (RK Puram) laga swagat kurikina, Delhi BJP chief Virendra Sachdeva para koisey ki taikhan Assembly te jitiya picheyte, etu party para central, state aro municipal level te joldi ekta “triple-engine government” banabole asey.
Sachdeva para agey barikina koisey ki AAP councillors para BJP tu ekta safa aro behtar Delhi nimitey join kurisey.
Etu MCD mayoral election tu April te hobole asey. Akhri mayorak election tu November 2024 te hoisiley kotey AAP para BJP ke khali 3ta vote para haraidisiley.
Total 263 votes majotey AAP laga Mahesh Khichi para 133 votes paisiley aro BJP laga Kishan Lal para 130 votes paisiley.
Utu homoitey, BJP logotey 113 councillors aro total 121 voting strength thakisey. Dusra faley AAP logotey 125 councillors aro total 141 voting strength thakisey.
Delhi Assembly election picheyte, BJP tu ekta tagra position te asey. Delhi laga ahibole thaka mayor laga election nimitey 14 MLA aro 7jun MP vote dhalibole eligible asey.
Add Comment