Delhi te etu saal 100 dengue cases thurikena ase

New Delhi: Etu saal pithor te komti hoile be national capital te 97 dengue cases thurishe koishe, koikena Monday din civic report hesab te junaishe. January 1 darik para loikena August 1 darik dak te dengue cases toh 2018 saal beche etu saal sobse besi ase aro hesab korishe koile etu eke samai 107 cases thakishe. August moina te 45 cases khobor thakishe, koikena report para janaishe aro etu toh total cases te 46 per cent ase. Municipal corporations laga civic report hesab te 97 dengue cases toh etu saal August moina te khobor thakishe. 5 moina laga cases hesab toh-  January (0), February (2), March (5), April (10), May (12), June (7) aro July (16) cases thakishe. Puila saal te etu samai 487 (2016), 604 (2017), 107 (2018), 92 (2019) aro 78 (2020) thakishe koikena report para janaishe. Hoilebi, etu samai city te dengue bemar para manuh mora khobor toh nai. Monday din civic report hesab te 45 cases malaria aro 26 cases chikungunya bemar toh etu saal August 28 darik te khobor paishe. Malaria, dengue aro chikungunya bemar samai high fever hoi, etu nemite doctors para kowa toh manuh khan COVID-19 thurishe koikena suspect hoi thaki. Delhi te Civic bodies para vector-borne diseases para pachikena thakibo nemite mon thikena kam kori ase koishe. North Delhi Municipal Corporation laga Standing Committee Chairman, Jogi Ram Jain para jowa hafta public health department laga officials logot meeting korikena dengue, malaria aro chikungunya laga kotha koishe. Jain para officials logot NDMC jaga pithor sob te awareness campaigns thakina manuh logot janai thiboli koishe. Tai para aro hotai samai mosquito thaka jaga neshina government buildings, schools, offices, community buildings aro dispensaries te check koriboli janaishe.