Nagaland Civil Secretariat Conference Hall, Kohima te 5th March 2025 te, Deputy Chief Minister, T.R. Zeliang, Minister incharge of Planning & Transformation and National Highway laga under te ekta review meeting rakhisiley. Etu meeting tu National Highway banaithaka tu kiman agey barisey etu check kuribole aro etu project tu eku kaam bhal para hobole nidiya problem khan ke saidibole nimitey rakhisiley . Etu Deputy Chief Minister para highway bana laga kaam tu thik homoitey complete kuribole nimitey homoi-homoitey review kurithakibo lagey koikina janaisey.
Etu meeting tu 28th January 2025 te huwa last meeting laga Action Taken Report laga review kurikina suru hoisey. Etu meeting te bisi bhak problem tu solve hoisey hoilebi kunba dangor problem tu solve nohoikina thakijaisey. Solve nohoikina thaka ekta jaruri mamla tu Peren-Dimapur (Package-V) aro Kohima-Jessami (Package-II) te national highway banabole nimitey maati kinibole thaka laga bari te asey. Peren-Dimapur (Package-V) laga Land Acquisition(maati kina) aro Damage Compensation(damage kora nimitey poisa tera) mamla te, DC Chumukedima para inform kurisey ki damage compensation ke finalize kuribole diri huwa tu Horticulture, Agriculture aro PWD (Housing) nisna department khan para kiman poisa terabo lagey etu laga hisap nidiya nimitey asey. Etu opor te, kunba jaga khan te rasta laga layout bana te correction kora para etu kaam ke delay kuridisey. Hoilebi, tai para biswas dikaisey ki etu mamla ke joldi khotom kuridibo aro NHIDCL ke para taak joldi submit kuridibo.
Kohima-Jesami (Package-III) laga bari te, Deputy Chief Minister para Contractor ke kaam tu logalog suru kuridibole koisey aro judi diri hoisey koiley taikhan laga contract khotom kuridibo koikina warning disey. NHIDCL aro Deputy Commissioner Phek duita para bi etu contractor ke kaam nukurikina public khan ke bisi diktar te dhalidiya nimitey gali disey.
NHIDCL para Merangkong-Tamlu-Mon (Package-IV) project te Konyak Union aro Civil Society para kaam laga quality ke loikina objection kora nimitey diktar ahikina asey koikina janaisey. Aro etu badha aha nimitey, etu kaam tu delay hoisey aro government nimitey aro bisi khorcha hobole disey.
T.R. Zeliang para civil society laga watchdog(nigrani rakha nohoilebi samaj laga raksha kora) laga role ke dhyan te rakhikina taikhan ke ki-ki problem asey etu khan tu kaam rokhaikina nohoikina thik channel laga through te janabole request kurisey. Tai para jordikina koisey ki quality laga bari te complaint kora tu District Administration nohoile NHIDCL logotey verification nimitey lodge kuribo lagey. Judi taikhan laga complaint tu jayes asey koiley, golti kora contractor laga against te thik action lobo.
Zeliang para etu bi inform kurisey ki tai 11 March 2025 te contractor aro NHIDCL para face kora chutu-chutu problem khan ke address kuribole nimitey Kohima Bypass te jaikina inspection kuribo.
Etu meeting ke Commissioner & Secretary (Works & Housing) Kesonyu IAS, Commissioner & Secretary (Land Revenue) Zasekuolie Chusi, IAS, Executive Director NHIDCL, Deputy Commissioner of Kohima, Chumukedima, Phek and Meluri aro DC Office, Peren laga representative para attend kurisiley.
Government tu diktar khan dur kuribole aro National Highway Project khan homoi te khotom hibole dibole nimitey committed asey, kuntu toh Nagaland laga infrastructure development aro economy baribole nimitey jaruri asey.
Add Comment