Dibrugarh  te NIA para Maoist leader thurishe

GUWAHATI: Sunday din upper Assam’s Dibrugarh district te National Investigation Agency (NIA) para woman(maiki)  CPI (Maoist) leader ke thurishe, koikena khobor para janaishe. Etu maiki Maoist leader ke toh besi din para pesari thaka ase aro tai laga nam toh Reema Orang alias Saraswati ase koikena janishe. Sunday din National Investigation Agency (NIA) para alag-alag 17 jaga neshina- Assam’s Cachar, Karimganj, Dibrugarh aro Dhubri districts te search operation thakishe. Khobor para janaishe ke, National Investigation Agency (NIA) para etu search operation kora toh hoile olop din akhe top Maoist leader Arun Kumar Bhattacharjee alias Kanchan Da ke thura connection case nemite ase koishe. March 7 darik te Assam police para Maoist ideologue Arun Kr Bhattacharjee aro tai laga associates Akash Orang alias Kajal ke Cachar district para thurikena ase.  70-umer  Arun Kr Bhattacharjee toh CPI (Maoist) laga central committee member ase aro tai laga matha oper te Rs 3 lakh reward thakishe. Kajal toh Assam State Organising Committee CPI (Maoist) member ase aro tai toh Patimara Tea Garden, Cachar district para ase koishe. Police para koishe ke, Kanchan da aro tai laga associates melikena Assam aro dosura Northeast states te CPI (Maoist) network logot khobor pongchai thaki koishe. Etu case toh puila Crime Branch Police Station, Guwahati te registered hoikena thakishe, hoilebi itya NIA para investigation loishe. Tai khan logot search kora samai, digital devices aro CPI (Maoist) laga documents besi paishe koishe.