Digestion bhal hubo laka rasta.

Sob manu digestion bhal nohoa laka din thakeh, pet phuleh, ulti lageh, nohoi lehbi pet jai.

Aro kitia etu khan hudai hoi,gao nimeteh bhal nathake. Hoilebi ami khan kha loa toh bhal kuribo pareh,  yateh rastah dikhabo kinika digestion tai nijor bhal kuribo pareh.

• Kha loa bagan laka khabi. Ami khan western khaloa teh refined carbs, saturated fat aro food additives bishe kha karneh pet digestion bhal nohoi hoijai. Icecream teh artificial mitha kuribo karneh saman cholai, aro etu digestion karneh bhal nathakeh.

Ekta puria likha teh dikheshe 50 grams artificial sweetener xylitol kha toh pet phulejai aro pet bi jai dikheshe 70% manu lokot, aro 75 grams sweetener erythirol kha teh 60% manu lokot etu bimari huishe.

Hoilebi scientific evidence ase kha loa nutrients bishe thaka toh digestion karneh bhal ase kuina. Etu karneh kha loa bhal, pakan laka sobji khan bishe khai jailehmani laka digestion tai nijor bhal huijabo.

• Fiber thaka bishe khabi. Sob manu janeh fiber toh digestion karneh bhal ase kuinah. Soluble fiber toh oat bran, nuts aro seeds khan teh pai, aro insoluble fiber toh pata kha loa,, whole grain, aro wheat bran teh pai. High fiber kha loa  toh digestion biya huboleh komti kureh deh.
• Kha loa tail bhal khan khabo lageh. Bhal digestion hubo karneh bhal tail kha loa khabo lageh. Puria likha teh dikhai shae omega-3 fatty acid kha toh amikhan ulcerative colitis hubole chance komti kurideh. Kha loa omega-3 fatty acid thaka khan toh flaxseed, chia seeds, nuts, tail mas, sardine khan teh ase kuishe.
• Pani bishe khabi. Pani komti kha karneh latrine bhal para kuribo napareh,  expert khan kuishe 1.5-2 litre pani khaileh constipation huboleh chance komti kurideh. Etu karneh orom jaka teh thakileh bhal ase pani khabo karneh, nohoileh exercise kuribo lageh.

Gao teh pani thakiboleh karneh tomato,  khera, angur khan kaileh bhala ase.

• Stress bishe nalubi. Stress hormone toh amikhan laka digestion biya kurideh. Ami khan kitia stress loi, amikhan digestive system teh khun thaka toh jaijai. Amikhan laka pet aro dimak toh connected ase, etu karneh dimak teh ki bhapna thake pet tehbi digestion biya kurideh.
• Asteh para khabi. Ami khan dhyan nadileh bishe khiade olop homoi teh, aro etutoh pet phulaide aro digestion bhal nohoi huijai. asteh para saina kha toh bhal ase kuina Puria likha teh kuishe, aro digestion nohoina thaka bhal huijai.

Kha homoi teh asteh para khabi, phone aro tv saina bhat nakhabi, aro kha loa ki khai ase etu janina khaboleh kuishe.

• Bhaat mehen kuribi. Digestion toh muk para shuru hoi, amikhan daat toh bhaat khe mehen kurideh aro enzymes khan pet teh thaka toh bhal para mehen paribo karneh ase. Amikhan bhaat bhal para mehen kurina khaileh, amikhan laka pet komti kaam kuribo huijai, taan khaloa mehen kurina pani huina chotu nari teh jabo karneh.
• Exercise kuribi. Hudai exercise kureh toh sobse bhal rata ase digestion bhal hubo karneh. Etu karneh bhaat kha piche teh olop bira toh bhal ase. Ektah pura likha teh manu constipation thaka khan hudai 30 minutes exercise kuri picheteh pet aram huijaishe.
• Bishe bhuk huina nathakibi. Ami khan kitia bhuk bishe lageh khaloa bishe khaideh aro pet phulijai, digestion bhal nohoa huijai. amikhan laka dimak toh bis minute  picheteh hi janeh ami khan pet bhortah huishe kuina kuishe.
• Biya adaat charibi. Ami khan janeh biya adaat  khan mudu kha, biri kha, aro bishe rati teh baat kha toh gao nimeteh bhal nohoi. Aro etu khan digestive bhal nohoa teh bi huijai.

Biri kha toh ami khan sob jane gao karneh bhal nohoi kuina,  aro etu biya adaat toh charileh digestion bhal huijai kuina kuishe.

Mudu bishe kha toh pet karneh biya ase, aro pet bikha khan ulaijai pet ulcer, acid reflux khan nishena. Etu kaneh mudu komti khaileh digestion karneh bi bhal ase kuishe.

Rati teh bhaat khaina ghumai ja toh digestion nohoi aro heartburn bi thake. Apuni gao toh digestion kuri boleh homoi lageh, etu karnehbhaat kha picheteh tin char ghanta toh rukhibo lageh ghumaboleh, bhaat khe chutu nari teh ponchibo dibo karneh.