Dimapur, 05 August: Sunday rati 9 am phali Purana Bazaar jaga deh Eastern Christian College, Dimapur laga ekta student laga theng (leg) ke bondukh para hamla koise. Hamla kora manu toh Shekiho Awomi laga bacha Puloto Awomi para korise. Etu manu toh Puranabazaar Dimapur deh thaki.
Jokhom khaa student ke jani powah toh, Nikato Yeptho ase. Tai toh B.A 5th semester student ase aro tai All Nagaland College Students’ Union (ANCSU) deh ECC representative be hoi. Hamla howah shaat-shaat tai ke joldi Dimapur Hospital deh loijaise aro tai etiya kathara (danger) para pahar ase.
Report hisaab deh, jokhom kaa student aro tai laga tuita shati (friends) toh tai khan laga shati khor para korai thaga time etu hatsa hoise.
Source koise, culprit para country made point 22 pistol para tui-par hamla korise. Ekta hamla toh missed hoise aro tusara wala hamla student ke lagise. Etu toh ke karni hamla korise najani hoilebe khobor hisaab deh tai toh pura nisha (drunk) deh thakise.
ANCSU aro Dimapur Naga Students’ Union (DNSU) para etu hamla ke ektum gara para kilaaf korise aro culprit ke law enforcing agencies para saja debo nemide demand korise.
Release deh ANCSU koise, eku galdi nathaga student ke enaga hamla kora toh students community nemide ektum kathara laga ase. Etu issue opor deh ensaaf nidiya tak kelaaf kori thakibo koise aro concern authority ke kenaga hoilebe culprit ke bail nadibole koise.
Alak kelaaf kora ke DNSU koise, Students aro general deh public khan kon ke hoilebe enaga morom nathaga galdi kaam kora toh lobole napara laga ase. Culprit ke be law hisaab deh gara saja debole demand korise.
Add Comment