Dimapur, 05 November: DC Dimapur laga conference Hall deh monthly District Planning and Development Board (DPDB) meeting toh 5th November 2019 deh loise.
Deputy Commissioner Dimapur, Anoop Kinchi IAS toh vice Chairman DPDB Dimapur be hoi. Tai toh meeting deh chaired thakise aro sob members ke welcome kora thakise, Kinchi hisaab deh DPDB toh ektum kaam laga monthly meeting ase. Tati sob department officers toh eki logode bohoi aro issue opor deh kotha korikena issue thek korae. Etu nemdie Kinchi para sob members ke DPDB meeting toh serious lobole koise aro meetings deh toh para tak ahibole koise.
Meeting deh Medical Superintendent Dimapur, Kheshito para district Hospital, Dimapur deh Hemo- Dialysis Center bonabole laga plan opor deh highlight kora thakise. Tai koise, CSR, Airport Authority of India toh agae ahikena 4 to 6 Dialysis machines debole janaishe. Etu toh concern authority para installation nemide clearance deya bechide debo. Tai koise, Dimapur district ekala laga thousand opor partient toh Dialysis deh jai. Etu deh nai nai koilebe Rs4000 to RS.5000 per Dialysis jai. House para Hemo Dialysis Center bonabole laga plan toh recommend korise aro vice Chairman DPDB para etu issue opor deh medical department ke lekha thakibo. District Transport Officer Dimapur, Nyamo Jami para department’s activities toh power point presentation logode deshe. Board para be 4 societies laga registration nemide manise. Etu ke Naga Forensic Society Association, Old Boys Association of Sainik school, Nagaland Chapter, Little Buds Educational & Welfare Society, Keren Sumi Foundation be melikena ase. Meeting deh Board members para be Christ School Ekhyo Yan toh Class VIII tak upgradation nemide recommend korise. Agriculture and PHE departments ke toh next DPDB meeting deh tai khan laga departmental activities present kuribole janaishe.
Add Comment