Dimapur khan Mon lokot final teh kheliboleh ase; Dr. T. Ao Inter-District Football Tournament.

Dimapur District Football Association (DDFA) khan para Peren District Football Associaiton (PDFA) khe haraishe Pursunep laka goal para aro final teh jaboleh ase 22^nd Inter District Dr. T. Ao Football Trophy teh.

Dimapur khan etia thak bhal khelina ekta goal bi nakhaina ase.

Dimapur khan etia Mon District Football Association lokot kheliboleh ase April 29 final teh.

First semifinals Peren lokot kheleh teh, Dimapur khan bhal shuru kurishe Kakhevi Assumi para bhal marina loijaishe hoilehbi goal net chuboleh parehnai. First half teh duitah team bi goal dhaliboleh pareh nai.

40^th minute teh Pursunep laka heading karneh Dimapur khe final luijaboleh parishe.

Peren team khan chance paishe goal score kuriboleh hoilehbi tai khan laka strikers khan etu homoi laka advantage luboleh napara huijaishe. Final whistle teh Peren team khan goal dhaliboleh napara huina thakishe aro tai khan semifinals harishe Dimapur laka haat teh. Dimapur laka goalkeeper Humuka bhal kheleh karneh Dimapur khan ageh jaboleh parishe.

Second semifinals teh, Mon District Football Association khan bhal khelishe aroTseminyu Football Association khe 1-1 draw huboleh parishe. First half match teh Mon   khan para match toh haat teh cholaishe aro striker Laiwang Bohamm Konyak para 29^th teh goal dhalibo parishe. Hoilehbi Tseminyu laka playmaker Sinenlo Kath para long range kick marina 67^th minute teh game wapas aniboleh parishe.

Hoilehbi shootout teh Tseminyu khan convert kuriboleh pareh nai aro tai khan tournament para ulai jaishe.

Penalty shootout teh Honon Konyak tai laka shot miss kurishe aro Mon karneh bhal thakishe tai khan laka Eshong Konyak para Tseminyu laka Zeaneiko Miasalhou laka shot rukhabo parishe. Tai khan laka playmaker Sinenlo kath bi penalty kick miss kurishe 6^th spot teh, aro Pangtech Konyak para last shot marina score 5-4 teh Mon khan jetiboleh parishe.