Dimapur, Nagaland laga ekta sob se dangor aru ekta important jaka ase. Etya Dimapur ke Nagaland laga commercial capital bhi mate jai. Business, transport aru communication laga center hoile bhi, Dimapur ekta dangor problem face kuri ase—etu problem juntu sob manu dekhe aru experience kure, kintu olop manu khan serious nahoi karone—etu hoise, ‘saba na thaka’.
Dimapur te besi jaga te kachra dikhe. Roadside, market area, residential colony te dustbin overflow hoi thake, drain blockage kuri thake, aru bishi biya para letera hoi thake. Kachra to collect nakure, aru manu bhi nijor kachra olop bhi jaga dekhi le phekhai di thake. Aru etu khan sob problem to monsoon ahile ekta dangor problem hoi jaye. Pani jama hoi, mosquito bisi hoi jai, aru bimari bi bhila suru hoi jai.
Cleanliness to khali dekha laga ekla karone nahoi, etu public health aru city development laga ekta basic requirement ase. Jitya jaga clean na thake, tate tourist bhi ahibole mon nathakibo, aru bahar manu khan bhi Dimapur ke bhal nazar para na dekhebo. City laga image biya hoijabo. Etu karone cleanliness important ase—health, environment, aru Dimapur laga future karone.
Dimapur Municipal Council (DMC) aru alak NGO sob kosis kurise, awareness program dibo karone. Kintu eneka sob initiative bhal para kaam nakure, public support na thaka karone. Juntu olob manu help kuribo kosis kurise, kintu majority manu sob etya bi nijor laga responsibility na buje aru na loi. Road te kachra phekhai ase, drain te plastic jama kuri ase, aru dustbin to use na kure. Moi khan etu attitude change kuribole bishi important ase.
Government side para bhi besi step lo bole lage. Regular garbage collection, dustbin installation, proper drainage system, aru fine laga system introduce kuribo lage. DMC bhi strict hobo lage ase— public awareness kuribo lage, aru total enforcement kuribo lage.
Public bhi nijor laga side para kaam kuribole etya bishi lagi ase. Cleanliness ekjon cleaner laga kaam nahoi—sob manuh milai kena kura laga responsibility ase. Jodi apuni nijor ghor aru area sabha rakhibo, aru kachra jaga te phekhabo, already etiya half problem to solve hoijabo. Moi khan civic sense janibole lage aru ekjon ekjon ke civic sense laga kotha sikhabole lage. Government nahoile NGOs khan kiman awareness nahoile cleanliness drive kurile bi, manu khan civic sense nathakile to eku kaam nathaka hoi jai.
School, college, church aru youth group khan bhi cleanliness drive te participate kuribo lage. Education te cleanliness aru environment ke respect kuribole bhal para dikhabo lage. Etya Generation Next te cleanliness opor importance janibole ekta dangor kaam ase.
Dimapur ekta bishi bhal potential thaka ekta city ase. Jodi moi khan proper cleanliness maintain kurile, Dimapur northeast India laga model jaka hobo pare. Sob citizen, government, NGO, student aru business community milai kena kaam kuribo lage.
Sob ekta strong message dibo lage—Dimapur clean rakhibole. Clean city ase kowa to ekta bishi proud thaka laga kotha ase. Jodi ami khan etu ke serious na loile, tate future te problem bishi dangor hobo.
Clean Dimapur, Green Dimapur—etya time ase, action lobole!
Add Comment