Dimapur Tey, Youth Khan Para Self-Proclaimed National Worker Khan Para Assault Kurishey

December 17, 2024, 07:09 PM: Teenta manu khan ke self-proclaim national worker khan para assault kurishey, December 16^th tey.

Victim khan para report kurishey, tai khan laga car toh hoiley ekta scooty para lagai dishey koi kena, 10:00 Pm nishina aas paas tey, NL Road tey, DMP Night Carnival tey para wapas ahi thaka homoi tey, DDSC Stadium tey. 

Gari para ulai kena damage hoa laga check kuriboley, victim khan ke ekta anjan jaga tey loi jaishey, Thahekhu village tey. 

Victim khan ke scooty para wapas jaboley koidishey, & car ke rukhaidishey. Victim toh scooty bhi bhal para chulaboley napari kena thakishey, tai khan laga saathi khan ke ahi kena pick kuriboley koishey upai nathaki kena.

Victim khan laga friend modod karney ahi thaka homoi tey, aru bhi alag National worker khan laga group ke lok paishey, itu camp laga osor tey.

Charta manu khan ke matha tey bonduk rakhi kena dhamki di kena camp bhitor tey loi jaishey. Ekta manu toh polaboley pari jaishey, teen jon toh tatey hey thaki jai kena. 

Victim para tai khan laga innocence plead kurishey, tai khan ke marishey koi kena. Victim para justice nimitey demand kurishey, itu galti kuria manu khan ke law laga hisap tey, punish kuriboley koishey.

Sub Urban Police Station tey FIR lodge kurishey, December 17^th, 2024 tey.