Director Soham Shah para koisey Squid Game para tailaga film Luck laga idea chor kurisey

New Delhi, September 15 : Director Soham Shah para Netflix laga khilaf te Korean series ‘Squid Game’ banabole nimitey  tailaga 2009 te release huwa film ‘Luck’ para idea loikina nijor laga idea nisna dikhaisey koikina ekta kanooni case file kurisey.  Aro Netflix para Sunday din te koisey ki etu iljam te eku daam nai. Netflix laga ekjun spokesperson para ekta statement te koisey, “Etu iljam te eku daam nai. Squid Game ke Hwang Dong Hyuk para banaisey aro likhisey aro amikhan para etu mamla ke joborjost defend kuribole asey.” American outlet TMZ para case kora laga documents pa hisap te, Squid Game kuntu tu 2021 te Netflix te ola homoitey manu khan para sobsey bisi sa series hoisey etu laga idea tu Imran Khan, Shruti Haasan aro Sanjay Dutt laga film ‘Luck’ para loisey. Squid Game ke Hwang Dong Hyuk para banaisey, likhisey aro direct kurisey. Etu film te 456 khilari thakisey, kun khan ke 45.6 billion won laga prize jitibole laga chance nimitey ekta jaanleva baccha laga game khilibole dibole nimitey ekta secret play te anisey. Dusra faley, Luck tu ekta underworld kingpin laga bari te asey kuntu te duniyabhor para ‘luck’ thaka manu khan ke bisi challenges khan te hisa lobole recruit kurisey. Aro etu challenges khan ke duniyabhor te gambler(juwari) khan para taikhan laga opor te boli lagabo. Documents te, Shah para etu bi dawa kurisiley ki tai para etu film laga kahani 2006 fale likhisiley aro etu film tu July 2009 te release hoisey.