‘Djokovic tho ATP finals kili bo kui nah mui doubt deh ase’: Federer laka ex-coach

October 27, 2024: Season-ending 2024 ATP finals tho November 10 para 17 tak lubo leh schedule ase. Men’s singles category deh, Jannik Sinner, Alexander Zverev, Carlos Alcaraz aro Daniil Medvedev kan puila para heh qualified ase aro itia chartha jaka baji nah ase, fill hobo leh. Novak Djokovic tho aha hapta laka Paris Master lokot deh olai jai shae, kuto para taila qualifying chances tho doubt deh rakhi di shae, ATP finals karne. Serbian tho itia sixth position deh ase, finals deh punchi bole. Roger Federer laka former coach Ivan Ljubicic para ekta interview deh, taila favorite pick kuri shae, aha ATP Finals karne. Sky Sports keh kotha kuri  nah, tai para etu kui shae,” Sinner tho ATP Finals deh dangor favorite ase. Kile koile Alcaraz itia b muike indoor deh convince kuri bole baji nah ase. Outdoor deh taila level tho bishi high tase, hoile b tai indoor kila time deh tai duk pai. Turen deh tai jua sal bishi duk pai shae. Etu tho change hobo nah nahubo kui nah sabo. Djokovic laka kotha kura time deh, tai para tai ki expect kuri bole lakeh, etu tho najaneh kui shae. Tai para rankings deh uthi bole players kan bishi kili bole lakeh kui shae, hoile b tai tho physically aro mentally ready nahoi kui shae. “Tai Finals kilie bole mui doubt deh ase, hoile b tai aha sal aro koshish kuri bo,” tai para kui shae.