Agencies:
Friday (India time hesab te Saturday) te United States President Donald Trump announce kurishe ke North Korean leader Kim Jopng-un logote second summit meeting February te kuribole ase. Second summit meeting toh Vietnam, Capital Hanoi te February 27 aro 28 te hubole ase.
Trump tweet kuri kena koishe ke moi Chairman Kim ke lok kuribole rukhi ase aro tai logote shanti laga cause agay barabole rukhi ase. Kim Jong-un laga leadership nichete North Korea toh economically ekdam shaktisali hoi jabo. Tai dusra manu khan ke surprise kuri dibole paray hoile bhi tai moike asorit nokuribo. Kile koile moi tai ke janishe aro ai ke kuribole paray moi etu janishe. North Korea toh dusra kisim laga rocket hoi jabo. Aro etu toh economic laga hubo koishe.
Reuters laga khobor hesab te North Korea te US Special Representative Stephen Biegun para Pyongyang te summit taiyar kuribole teen din kotha kurishe.
February 5 State of the Union te kotha kora samay te Trump para North Korea leader Kim aro tai majote thaka meeting nimite Vietnam location announce kurishe. Hoile bhi kuntu city te meeting toh kuribo etu laga kotha toh disclose nokuri kena thakishe. Summit laga announcement toh January te dishe. Trump Congress ke koishe judi moike president hesab te elect nokuri kena thakile toh etu duita desh toh “major war” hubole thakishe.
Duita leader toh first time June 12 Singapore te lok kurishe. Etu toh historic summit nimite thakishe. Etu meeting pichete Kim toh Korean Peninsula te complete denuclearization nimite commit kurishe.
Add Comment