Dry state laka ki halad ase ?

Nagaland toh ekta dry state eneka mani jai boila bara hoilebe, saile naam neshina eku nathake. Kali Nagaland te he nahoi-Bihar, Gujarat aro Mizoram te bhi dry state mani jai. Beshi youths khan aro dangor manu khan motu kha khan beshi ase aro kali dangor khan he nahoi aji kali chotu batcha teenage khan bhi motu khan te involve kura beshu ase. Dry state ase koilebe motu khan manu khan bara motu toh kude bara babo edu toh bahal bara jane aro loka loki kuri kina motu bekeri kura beshi ase. Government bara state ke dry state kuri diya toh beshi bahal kaam ekta ase hoilebe , manu khan motu laka dukan nathakilebe public khan eman available bara motu lokai kina kene kina khabole bari koile ekta dry state hua toh eku kaam nai. Dry state kua toh state te motu dukan khulibole allow nai ,nahoile public khan karne health karne safety karne bonaishe koile public khan laka lifestyle saile eku eneka nathike. Kindu kha kan bara toh aram bara kene kina khai thaki ase. Dry state ase koina eman available bara motu quality biya khabole ase koile, ene motu khor openly khuli di kina bahar bara bahal dealer bara quality bahal bekeri kuribolr dile public karne edu he bahal hobo naki eneka bhabna ase. Kindu ki quality bekhai lebe public khan bara motu toh khabole he ase. Motu toh hisab bara khaile eku nahoi ,hoilebe amekhan manu khan limit najani kina motu beshi khai de. Aro beshi family tee du motu bara family magor te bhi beshi dekdar ane diya ase, kunba khan nesha hoi kina nejor maiki khan ke hath utha bhi beshi aro khor de jamala  aro dukh beshi diya bhi beshi common problem ekta ase naga society te. Kali edu he nahoi youth khan laka sobse common biya jiz ekta toh talab aro gutkha ase . Aji kali chotu batcha bara edu khabole shuru hoi aro edu toh motu neshina beshi biya ase khau karne. Edu talab khan toh subari biya hoi kina buchi kina bhelai diya bara bona ase, edu bara khau bedor laka intestine sob biya kuri de aro beshi manu edu regular basis te eku limit nathaki kina, life nathakia hui ja bhi beshi ase. Governemt khan public laka health concern karne edu laka matter bhi saile beshi bahal hobo. Kindu edu khan market te available thakia tak toh public khan aro consumers khan kene thakibole ase, kindu market te available thakia tak toh kha khan bara charibole nabaribo. Edu bara baria tak. Public leaders khan aro Social workers khan aro leaders khan,government lokode melai kina sob melai kina edu laka issue te keneka solutions anebo edu laka plan kurebole lakae. Kindu edu bara beshi manu laka life batcha bole barebo ahia samoi karne. Motu laka khota kurele State kiman restrict kure lebe black bara beshi bekeri kure ase, aro edu bara quality biya hoilebe boisa toh beshi mange aro , biya hoilebe public khan boisa beshi de kina kene loi. Edu bara lokai kina kena loi. Edu bara saile edu problem laka solutions toh motu laka dukan llegal bara khulibole dile bahal hobo, aro motu bhi bahal quality bara rakhibole dibo aro edu laka hisab te dam bhi thik quality laka hisab te bekeri kurebole baribo. Kindu kiman lokai eman manu khan busari aro charibole nabari , edu bara dukhan ke khula khuli bekai le public khan bhi mesa mesi boisa beshi de kina kenebole nalakibo. Aro edu te government bara age limit ekta raki dele beshi bahal hobo. Ekta age limit laka obo te he motu bekeri kurebole laka bonai le neshi bahal hobole ase. Nagaland laka bahar te kunba state tedo motu laka dukan toh available ase aro manu khan bhi edu market te beshi competition kure motu laka quality bahal khan bahar bara ane kina bekai. Edu hisab te business kura khan bhi lab aro keniya manu khan karne bhi bahal.