New Delhi, Febrary 9: Sunday(February 9) afternoon te British pop singer Ed Sheeran para Church Street te ekta umplanned performance di thaka homoitey adha te taikey Bengaluru City Police para rokhai disey.
Etu global music icon(Ed Sheeran), kun Bengaluru te tailaga Mathematics concert nimitey asey, tai Church Street te tailaga hit huwa gana ‘Shape of You’ kurithakisey jitya ekjun police ahikina sound system para tailaga microphone disconnect kuridisey. Online te ola ekta video te Ed Sheeran ke enaka kuwa huni thakisey, “Amikhan yatey thakibole laga permission paikina asey.” Tai para Instagram te jaikina enaka kahani koisey, “By the way amikhan logotey gana kuribole laga permission thakisey. Etu nimitey, amikhan utu exact jag ate gana kora tu agey para plan kurikina thakisey. Amikhan tatey aney misa-misi achanak para aha nohoi. Hoilebi sob thik asey.
Hoilebi police officials para koisey ki etu performance nimitey permission dikina thakanai. Shekhar H.T., Deputy Commissioner of Police (Central Division), Bengaluru City Police para koisey ki Mr. Sheeran logotey Sunday te Church Street te performance dibole laga permission thakanai.Tai para enaka koisey, “Event manager khan para amikhan ke permission mangibole ahisiley. Hoilebi amikhan para etu busy rasta te enaka events kuribole izazat diyanai. Kilemaney tatey biis dangor bhir jama hobole aro perform kora manu khan nijor bi bhir para gheribole laga chance asey. Etu nimitey amikhan para permission reject kuridisey. Hoilebi Mr Sheeran tu ahikina rasta te perform kora suru hoisey. Amikhan logotey amikhan laga emergency helpline 112 te public laga side para ekta call bi ahisiley. Etu picheyte amikhan laga police para jaikina tailaga performance ke rokhaidisey.”
Add Comment