Northeast India ekta culture, language aru natural beauty te bhori thaka ekta important jagah ase, kintu desh laga development kotha te bhal dhorika te dekha nai jaa. Bishi problem te etu region face korise, aru education aru youth empowerment etu duta sobse important problem ase. Northeast laga youth talented ase, hardworking ase, aru desh ke agot loi jaabo nimite ready bhi ase. Kintu system te thaka bhal education nai, facility nai, aru opportunity kom thaka karone olop pichute thaki jaa.
Urban jagah jaisan Guwahati, Imphal aru Shillong te to bhal school aru college ase, kintu rural aru remote jagah te quality school, trained teacher aru basic facility nai. Bandh, bhal road na thaka, aru electricity problem bhi education ke affect kori thake. Digital infrastructure aji kal ekdom important hoi jaa se, kintu Northeast te etu bhi baki region khan logot compare korile pichute ase. COVID-19 time te online class bhi bhal para na hoipare.
Higher education te bhi problem ase. Bhal college nai thaka karone student khan ke Delhi, Bengaluru nai to Kolkata jabo lage. Kintu paisa nai, culture laga difference aru discrimination karone bishi student adjust nohoi pare. Etu sob problem student laga confidence kom kori dise aru future te bhi affect kori thake.
Bishi student degree pai thaka logot bhi job nai paaye. Karon—Northeast te industry nai, job opportunity nai, business bhi kom ase. Etu karone unemployment dangor problem ban jaa se. Frustration te youth khan drugs, violence nai to insurgency te bhi involve hoijaa thake.
Etu gap ke bondhobole government ke serious hoijabo lage. Rural jagah te bhal school, college khuli bole lage. Teacher khan ke motivate kori bole incentive diya lage, jate bhal para thaki aru bhal para padhai diya pare. Curriculum te local history, language aru culture include korile student khan nijor identity ke bhal para bujhibo pare aru proud feel koribo.
Technology etiya ekta important role play koribo pare. Network aru digital knowledge provide korile student online learning te bhi access paabo. Career counseling, vocational training aru startup support diya lage jate education aru job ek logot mile.
Sabse important kotha—Northeast ke desh laga ekdom important part hisab te dekha lage. Textbook, media aru daily life te etu region laga culture aru diversity ke respect aru celebrate korile unity baribo.
Northeast India laga youth ke education para empower koribo etu ekta region laga kaam nohoi—etu pura desh laga zimmedari ase. Youth khan laga future te investment korilei India ekta inclusive aru equal desh bonibo pare.
Add Comment