‘Emergency’ film laga release postpone hoisey

New Delhi, September 02 : Lok Sabha laga Member of Parliament(MP) aro Bollywood actor Kangana Ranaut tu ekta bi moka nacharikina tailaga release hobole thaka film ‘Emergency’ ke lagatar promote kuri asey. Hoilebi, etya enaka lagi asey ki Kangana Ranaut para tailaga film laga promotion kurithaka tu olop homoi nimitey rokhabo lagibo. Latest report para dawa kurisey ki ‘Emergency’ tu postpone hoijabo parey. Release te enaka delay huwa tu etu film logotey jurikina thaka problem nimitey asey.  Etu opor te, August 31 te, Punjab aro Haryana High Court para Gurinder Singh aro Jagmohan Singh para file kora ekta complaint laga sunuwahi(hearing) kurisey. Taikhan para Emergency ke Central Board of Film Certification (CBFC) para diya censor certificate ke hataidibole request kurisey. Taikhan para etu bi koisey ki etu film theatre te release hobole ageyte Sikh laga dangor manu khan para etu ke check kuribo lagey. Etu opor te, Bathinda laga MP Harsimrat Kaur Badal para bi koisey ki Kangana laga film Emergency tu duniyabhor te release hobole ageyte SGPC(Shiromani Gurdwara Parbandhak Committee) para etu ke review kuribo lagey. Latest report te, Bollywood Hungama para koisiley ki CBFC para etu film te ana changes(bodli) ke approve kurisey. Hoilebi etu ke certification dibole lagi bari te vichaar kuri asey.  ‘Emergency’ film tu poila laga Indian Prime Minister Indira Gandhi para desh te Emergency impose(lagu) kora laga bari te asey. Etu film ke Kangana para bi adha direct kurisey. Etya etu sabole baki asey ki etu film laga makers khan para certification board laga taraf para  taikhan laga film kitya clear kuribole paribo aro cinema te kitya release kuribo paribo.