Er. Zale Neikha Pora 12th Inter District Catch Them Young Tournament 2019 Khulise

Kohima: 12th Inter District Catch Them Young Tournament 2019 toh Advisor, Youth Resources & Sports, Er. Zale Neikha pora Kohima, Indira Gandhi Stadium te 16th October 2019 te khulise.
Etu occasion ke khushi kodha kowa te Special Guest, Er. Zale pora koise li Catch Them Young Tournament toh etya country te  bishi popular hoi jaise kintoh etu laga phabna toh jawan sports manu khan laga potential jani ke olaidibole aro ahibole laga somoy karne tai khan ke bonabole karne ase. Tai pora koise Youth Resources & Sports department toh jawan sports manu khan ke platform dibole aro tai khan ke champion bonai dibole karne tai khan laga skill ke   thar kuridibole ase. Sports manu khan ke khushi pai kena, Er. Zale pora koise Catch Them Young Tournament toh tai khan nijor ke janibole aro tai khan ke milibole laga thik sports ke chunibole thik platform ase aro tai khan ke mon di kena chutu kamiyab ke bhotani nahoi kena ektam mehnat pora sports te sobse phal hobole karne koise kintoh aji kali laga duniya te sports toh job moka aro livelihood hoi jaise. Coaches khan ke khushi pai kena, tai pora koise tai khan particular sport te thik tactics aro skill  dekhai kena trainees moka dibole lage aro parents khan ke tai khan laga burana phabna toh botli kuri kena olap tangor phabna logot te bacha khan ke aro bishi moka di kena aro tai khan pora sai kena bacha khan laga sabna bura kuri dibole karne challenge kuribole koise.
Secretary, Youth Resources & Sports, Alun Hangsing pora tai laga  exhortation te koise games aro sports toh manu laga jivan te ektam kam hesa hoise kintoh khao karne ekla nahoi kena sob development karne bishi mon di di ase. Tai etu bhi koise ki games and sports toh busty, district aro country khan laga biche te rishta phal hoi kena jai ase. Tai pora state e dhakiya sob participant khan ke mon tangor kuri dise aro khushi janai dise.
Director, Youth Resources  & Sports Akumla Chuba, programme laga chair person pora tai laga welcome address te koise ki Catch Them Young Tournament toh 1974 te motto “Catch them young and teach them right” koi kena suru kurise aro etu somoy te  football aro athletics ekla games and sports karne khili dhakise hoile bhi  aji department khan pora sai kena wrestling, boxing badminton aro taekwondo khan bhi ahibole sal karne dhali dise aro koise department khan pora district sob te pora  best talents sports mpanu khan ke loi kena tai khan phal training dibole karne moka dibo. Tai pora aro koise ki jowa  bishi sal te academy te pora   sportsmen  khan pora state te bishi tangor nam ani dhakise aro koise enika tournament  organize kuriya toh jawan talented sports manu khan ke loi kena Academy te train kuribole  dhali kena National aro International Level te state laga nam pora khilibole karne.   Tai pora Bhaichung Bhutia School Delhi laga duita representatives Nikhil aro Sumit  ke khushi janai dise aro taijun pora etu programe te pora best football players khan ke chuni kena state karne represent kuribole karne tai khan laga academy New Delhi te dhali kena train kuribole ase.
State laga sob district te pora eleven team represent kuriya te  Total 290 participants 215 moda aro 75 maiki  khan etu  teen din sports tournaments te hesa loise.