Etea Manipur laga Nutun Jamala te, Protestors Ekjun Murishe aru 40 nishina Jokhum Hoishe

Imphal, March 9, 2025: Saturday din te Officials para koishe ki, yete Manipur laga Kangpokpi District te, Kuki Manu khan aru Security Forces khan majo te jamala ulaishe, yete Protestor eku murishe aru alak 40 nishina khan toh Jokhum hoishe koishe, yete Maiki aru Police manu bi ase koishe. Police para koishe ki, Etu murea manu toh Lalgouthang Singsit ase koishe, tai toh 30 saal  ase, aru taike Guli lagishe koishe. Yete Keithelmanbi te jamala ula homoi te, aru taitoh Hospital ja homoi terasta  para murishe koishe. Yete  Union Home Minister Amit Shah para State te free para jabole laga tarika kurea nimete, Kuki laga Dominated District te, Security Forces khan aru kuki khan jamala ulaishe koishe. Yete taikhan toh Imphal para Senapati District tejabole laga homoi te, Kuki Manu khan para etu khushi napai kina Protest kurishe koishe, aru Private Gari khan bi julai dishe koishe, taikhan laga rasta bon kuribole nimete. Police para koishe ki, 16 protestors manu nishina Jokhum hoishe yete Security Forces khan logote  jamala ula homoi te, etu toh Gamgiphai, Motbung aru Keithelmanbi jaga para. Aru koishe ki utu jaga te toh Treatment kuribole Public Health Centre bi nai koishe. Aru Manipur Police khan toh 27 Security manu nishina khan bi jokhum hoishe koishe. Police khan laga hisab te, etu toh kinaki suru hoishe koile toh, yete Manipur State Transport Bus toh Imphal para Kangpokpi aru Senapati te jabole laga rasta te, etu Mob khan para gari te pathor phila suru hoishe Kangpokpi District laga Gamgiphai rasta te, aru Protestors maiki aru bacha khan rasta te khara kuri thakhishe, aru Pathor dangor aru ghas khan bi kati kina rasta bon kuri thakhishe koishe, yete Security Forces khan para taikhan ke rukhabole suru kurishe. Yete Protestors khan para bi National Highway (Imphal-Dimapur Highway) toh bon kurishe, yete taikhan rasta te tyres khan julai she, yete Government laga gari khan ke birabole nadibo nimete.