New Delhi, February 12: Poila laga Congress MP Sajjan Kumar ke Delhi Court para Wednesday din te, 1984 te anti-Sikh riot(Sikh khan laga khilaf te jhamela) ola homoitey duijun Sikh manu ke moraidiya laga mamla te doshi paisey. Taikey ki sajai dibo etu laga behest u February 18 te hobo.
Sajjan Kumar tu etya Tihar jail te asey, etu anti-sikh jhamela logotey jurikina thaka aro ekta murder case nimitey. Tai laga opor te ekta bhir ke lead kurikina November 1, 1984 te Delhi laga Saraswati Vihar area te Jaswant Singh aro tailaga chokra Tarundeep Singh ke moraidibole bharkai diya laga iljam lagikina thakisey.
Etu anti-Sikh jhamela tu poila laga Prime Minister Indira Gandhi ke Operation Bluestar picheyte tailaga duita Sikh bodyguards para taikey moraidiya picheyte suru hoisey.
Etu Delhi court para etu case te juwa December final behes huna picheyte etu faisla loisey. Hearing chulithaka homoitey, prosecution para koisey ki Sajjan Kumar para lead kora bhir, kun khan hathyar bukhikina thaisey, taikhan para Sikh khan laga property te bisi loot-paat kurisey, jui jolaisey aro bhanga-bhagi kurisey.
Jaswant Singh aro tailaga chokra e moraidiya picheyte, etu bhir para taikhan laga ghor jolaidibole ageyte taikhan laga saman khan lootisey koikina prosecution para koisey. Hoilebi Sajjan Kumar para etu case te tailaga statement record homoitey tailaga khilaf te thaka sob iljam tu manibole inkar kuridisey.
Court para koisey ki Sajjan Kumar tu khali etu jurum te participate kora hey nohoikina tai para etu bhir ke lead bi kurisey.
Etu purana Congress leader ke poila te Sikh laga khilaf te jurum kuribole hosla baraiidya aro taikhan laga khilaf te gusa uthaidiya laga kotha kuwa logotey related bisi alag alag case te doshi paisey.
2014 te Narendra Modi laga BJP government power te aha picheyte taikhan para 1984 laga anti-Sikh jhamela laga case te re-investigation kuribole nimitey ekta three-member Special Investigation Team (SIT) banaisiley.
Add Comment