Farah Khan para reveal kurisey ‘Kabi Haan Kabi Naa’ film nimitey tai Shah Rukh Khan para bisi poisa paisey

New Delhi, June 16 : Shah Rukh Khan aro Farah Khan duijun bi 1965 te jonom hoisey aro film industry te 1992 te jonom hoisey. Shah Rukh Khan laga film industry te suruwat tu ‘Deewana’ fil logotey hoisey. Aro Farah Khan laga suruwat tu ‘Jo Jeeta Wohi Sikandar’ logotey hoisey. Radio Nasha logotey kora ekta interview te choreographer aro director Farah Khan para reveal kurisey ki Kundan Shah laga 1994 te release huwa film ‘Kabhi Haan Kabhi Naa’ nimitey tailaga pay Shah Rukh Khan para bisi thakisey. Farah Khan para kosiey, “Etu film laga budget bisi komti thakisey. Etu film nimitey Shah Rukh Khan Rs 25,000 paisey. Aro ami tu etu film te sobsey bisi pay pa manu thakisey. Amikey ekta gana nimitey Rs 5000 pay kurisey. Aro etu film te 6ta gana thakisey. Aro etu karney hey ami Rs 30,000 paisey. Amikhan para ekta assistant tak bi afford kuribole paranai.” ‘Main Hoon Na’, ‘Om Shanti Om’ aro ‘Happy New Year’ nisna hit film laga picheyte thaka maiki Farah Khan para tailaga second film bana homoitey mushkil jhela laga bari te koisey aro Shah Rukh Khan para kinaka taikey bisi modod disey etu laga kotha koisey. Farah para koisey ki utu homoitey tailaga pregnancy ke loikina bisi diktar chuli thaksiey aro enaka koisey “Ek din, din laga majotey ami doctor para call paisey. Aro tai para koisey ki etu baar poila nisna huwanai. Taikhan etu homoitey ekta comic scene shoot kuri thakisey. Aro Shah Rukh Khan para kiba garbar asey koikina jani thakisey kilemaney ami kandibole thakisey. Toh, tai para break mangikina amikey tailaga van te loijaisey, kotey ami ek ghonta kandisey.” Tai para Sharukh ke kiba ekta kobole asey koisey. Aro Shah Rukh para taikey saikina “Apni pregnant asey?” hudisey. “Tai tu Darde Disco laga shooting khotom kuribole baki thaksiey. Aro jitya bi tai tailaga shirt olai ami ulti korey. Tai para amilaga osor te ekta bucket rakhidibo. Tai bisi morom kora manu thakisey. Tai para director laga chair laga bodli tailaga lazy boy couch anidiye taki ami tatey mic dhurikina lie down kurikina manu khan ke hala kuribo paribo.”