Fawad Khan para Indian fan khan ke bisi diri rokhaidiya nimitey maaf mangisey

New Delhi, July 21 : Fawad Khan, kun Pakistani drama logotey manu khan laga  favourite hoisey taikey Hindi film te olop homoi hey dikhisiley. Taikey Hindi film te akhri bar 2016 te release huwa film ‘Ae Dil Hai Mushkil’ te dikhisiley. Tai ke etya ekta supernatural show ‘Barzakh’ te dikhi asey. Fawad Khan para ekta Zooom interview te PTI ke koisey, “Ami hodai fan utu fan khan ke dhanyabad di asey kun khan ami nimitey rukhisey. Aro ami taikhan ke bisi diri rokhaikina rakha nimitey maaf mangi asey. Hoilebi etu amilaga haath te thakanai.” Tai para koisey, “Ami para etu biswas korey ki sob laga ekta nijor timing asey…Apni para koi ki ‘gair mojudgi para mon te morom aro bisi baraidiye’ hoilebi amikhan logotey aro ekta kahawat asey, ‘suku para dur hoija matlab dimak para bahar olaija’. Enaka bi hoi.” Nutun show ‘Barzakh’ te Fawad Khan ke tailaga ‘Zindagi Gulzar Hai’ co-star Sanam Saeed logotey dikhi asey. Etu show tu Friday din para Zindagi laga YouTube channel aro ZEE5 te ola suru hoisey. Fawad Khan laga popularity tu  taikey 2010 te Dastaan, 2011 te Humsafar aro 2012 te Zindagi Gulzar Hai show te dikha pichey para bara suru hoisey. Etu picheyte, taikey Hindi film Khubsoorat, Kapoor & Sons aro Ae Dil Hai Mushkil te dikhisey.  Tailaga  dangor Bollywood career tu India-Pakistan laga rishta te darar ahija nimitey  agey baribole paranai.