FIFA para ahi thakia Club World Cup karney $1 Billion Prize puisa set kurishey

France, 6 March : FIFA itu saal United States te hobole thaka Club World Cup te participants khan ke ek billion dollar prize money dibo, itu laga khobor negotiations laga ekta source AFP ke Wednesday din janai dise.

Itu amount bishon dangor ase, last men’s World Cup nohoile mahila laga World Cup te diya prize money te tulona kuri le.

World football laga governing body FIFA, itu nija 32-team tournament laga funding laga details olop diya ase, nohoile bhi, last week khan te ekta broadcaster aru dangor sponsors sign kuri lobo pua ase.

British streaming service DAZN ke December te itu tournament laga exclusive global rights dibole diya ase, aru ekta source koi ase ki itu contract laga worth dukh billion euros ($1.05 billion) ase.

FIFA Coca-Cola, Bank of America, Chinese electronics brand Hisense, aru Belgian brewers AB InBev logote bhi sponsorship contract sign kuri dise.

Tultona kuri le, 2022 men’s World Cup Qatar te prize money total $440 million thakise, aru 2023 mahila laga World Cup New Zealand aru Australia te $110 million thakise.

Itu season laga UEFA Champions League, nija nija 36-club format te, total 2.47 billion euros ($2.66 billion) clubs khan ke dibole ase.

FIFA laga itu tournament expansion Europe te beshi criticism face kuri ase, beshi kuri le players welfare karone.

Global footballers’ union FIFPro aru European Leagues association October te European Commission te FIFA uporde complaint file kuri dise, koi le FIFA calendar too beshi tight kuri thaki ase aru itu nija power misuse kuri ase.

UEFA bhi itu season Champions League expand kuri dise, aru players khan, juntu Ballon d’Or winner Rodri aru Liverpool captain Virgil van Dijk ase, hokol strike kuribo pare koi raise kuri ase.

Itu tournament te Europe para 12 team, South America para 6 team, Asia, Africa, aru North aru Central America para 4 team kuri lobo.

Auckland City aru Lionel Messi laga Inter Miami bhi itu tournament te ase.

Sob reaction khan negative nohoi, Paris Saint-Germain laga coach Luis Enrique koi dise ki “sob manu” itu kheli bole mon thakibo.

Itu tournament United States laga 11 city te thakibo, 12 ta venue te khel hobo, aru final MetLife Stadium New Jersey te hobo, juntu 2026 World Cup final bhi host kuribo.