New Delhi, 27 December : Veteran French coach Jean-Louis Gasset, juntu last Africa Cup of Nations te Ivory Coast pora fired kori dise pichete bhi team trophy jitise, tai 72 saal age te mori jaise. Tai laga former French club Montpellier Friday te itu khobor confirm kori dise.
Host desh Ivory Coast 2023 edition laga group stage laga last match te minnow Equatorial Guinea pora 4-0 te bhot dangor bhabe harise. Itu tournament history te sabote dangor upset ase, aru Ivory Coast nijor group te third place te finish korise.
Itu shock defeat pichete Gasset ke dismiss kori dise. Kintu Ivorians best third-placed finisher hisab te knockout rounds te qualify koribo parise aru last te Gasset laga assistant Emerse Fae laga under te title jitise.
France ulai ahise pichete ek mahina bhitor te Gasset ke Olympique de Marseille laga coach bonai dise, kintu tai matro chari mahina tei thakise.
Last season te tai Montpellier te wapas ahise, kintu club relegation laga dik te jai thaka karone April mahina te tai ke sacked kori dise.
Gasset laga playing career laga besi bhag Montpellier tei ase, jitu club tai laga baba founders majot ekjon ase.
Tai laga death laga reason disclose kori diya nai.
Add Comment