Rajneetik larayi te fasikina thaka, Nagaland rajya te bisi saal para alag alag jhamila olaikina ahi asey. Aro sobsey dangor problem tu tax utha laga asey kuntu toh Naga manu laga etihas te bisi ghonta laga asol karon asey. Ajikali bhitor te public khan ke gairkanooni tax utha, parishan kora, dhomki diya aro moraidibole dhomki diya laga khilaf te ekta public rally rakhisiley.
Dangor pani girithaka laga samna kurikina 100 opor manu Kohima laga Phoolbari te Old MLA Hostel junction te rally te bhak lobole karney jama hoisey. Etu rally tu Angami Youth Organization (AYO) para organise kurisiley. AYO para etu rally tu NSCN (Khango) group para ekjun local contractor ke tai para taikhan laga demand pura kuribole napara nimitey taikey moraidibole laga dhomki diya laga khilaf te protest kuribole nimitey rakhisiley.
Etu AYO public rally para bisi rasta te Naga manu khan ke Against Corruption and Unabated Taxation (ACAUT) Nagaland para October 31, 2013 te Dimapur laga City Tower Junction te ekta Public Awareness Rally rakha laga bari te yaad dilaidisey. Alag alag Naga political group para sob kisim laga tax uthaithaka aro corruption kora(poisa kha) laga khilaf te laribole laga pukar ke 40 thousand opor manu para respond kurisey. Aro etu picheyte, eksath milikina ‘One Government One Tax’ laga resolution anisey. Etu kurikina etya 11 years hoi asey hoilebi public khan tu etya tak bi gairkanooni tax utha laga shrap under te thakibole majbur hoi asey.
Gairkanooni tax utha, dhomki dikina poisa luwa, bhoi khela aro maribole dhomki diya laga khilaf tea was uthaikina, AYO para Nagaland laga Governor ke ekta official kagos submit kurisey. Kuntu te Nagaland te bhitor manu khan khan para khula-khuli gairkanooni kaam kurikina public khan ke diktar diya laga bari te zikar kurisey. Ekjun local contractor ke NSCN(Khango) group para moraidibole laga dhomki diya tu ekta dangor mamla laga chutu hisa hey asey. Kilemaney yatey enaka bisi mamla khan asey kuntu tu public khan laga najar te nohoilebi discussion te ahanai.
Nagaland Governor ke submit kora kagos te, kunba demand khan rakha logotey etu bi safa safi koisey ki “public tu etu bhitor manu khan laga kaam para ekdam amuni lagikina asey. Aro public khan para etu bhito manu khan laga khilaf te larayi kuribole bisi diri nai. Enaka hoisey koiley larayi jhagra olabo. Kuntu laga natija tu osor rajya(Manipur) te chuli thaka situation para bi biya hobo.
3 years ageyte, Dimapur Chamber of Commerce and Industries (DCCI) para September 16 te Dimapur te pura total business bandh rakhisiley. Etu bandh tu Nagaland gairkanooni aro bisi alag alag tax utha laga khilaf te Nagaland government para eku action nuluwa nimitey protest kuribole rakhisiley.
Nagaland te, tax utha laga matlab dhomki dikina poisa manga asey. Alag alag kisim laga tax utha laga burayi laga khilaf te complaint aro protest khan kora tu Nagaland te nutun nohoi. Civil Society(public laga bhalayi nimitey awas utha group) aro public organization khan gairkanooni tax utha aro etu laga khatarnak natija laga khilaf te larayi suru kora logotey, state government ke golti thehra laga sawal uthi asey.
Add Comment