Government scheme khan, juntu state aru central government para launch kuri kena ase, etu laga main aim to ase manu khan ke health, education, kaam, aru infrastructure te modot kuribole. Nagaland juntu ekta hilly state ase, juntu te bishi manu rural area te thake aru communication kom ase, etu jaga te problem policy bona laga te nahoi, kintu etu scheme khan ground level te thaka manu logot reach kuribo para te ase. Etu karone ekta question uthi jai: Etu scheme khan hosa te bottom level te thaka manu khan logot punchi ase na nai?
Aru bhal para janibo lage ke, Nagaland te bishi government scheme already kaam kuri ase. PMAY (housing), MGNREGA (kaam), PMGSY (road), aru National Health Mission etu khan actively kaam kuri ase. State government bhi nijor laga program khan cholai ase, example hoishe youth skill training, women welfare, aru agriculture support. Paper opor te to etu sob bhal ase, kintu ground te reality olop alag ase.
Main problem hoishe accessibility. Nagaland te bishi bosti khan dur dur te ase, rasta nai, light nai, communication nai. Etu karone scheme khan manu logot easily reach kuribo nabare. Health scheme juntu doctor logot relate ase etu khan na pathai, karon doctor khan jaibo nabare remote jagah te. MGNREGA juntu online para apply kura laga ase, bosti khan te internet nathaka karone problem hoi jai.
Dusra problem hoise awareness nai. Rural area te bishi manuh etu scheme khan na bisare, nahoile scheme para ki benefit etu khan bai nabuji kena ase. Etu chance loikena kunba middleman aru local leader etu misuse kure. Government funded ase, kintu kaam te bhal use kuribo napare, aru etu rukhi jai, corruption karone. Bishi case te fund release to hoi jai, kintu implementation te fail hoi jai.
Enika situation hoilebi ekta bhal news bhi ase. Kunba scheme, PMGSY para kunba remote bosti khan te rasta bonai dise. Etu para market te jaibo aru hospital te pounchibo bisi easy hoise. MGNREGA bhi kunba bosti te seasonal kaam provide kuriase, mahila khan bhi kaam pai, aru income earn kuriase. Kintu etu sob jaga te nahoi. Success case bishi kom ase, karon etu bhal para monitor nahoi.
Jodi actual te government scheme khan grassroots level te pounchabo karone, infrastructure develop kura bishi important ase. Roads, electricity, internet etu basic saman ase. Etu thakile bishi scheme kaam kuribo pare. Awareness program bhi bishi important ase. Church, student union, aru local leader khan ke scheme te include kuribo lage, scheme bisare manu ke bujai dibo karone.
Transparency aru accountability hoile, scheme bishi kaam kuribo pare. Mobile app para track kuribo pare, aru DBT (Direct Benefit Transfer) use kurile, corruption kom hobo. Manu ke feedback dibo nimite opportunity dibo lage, aru complain kuribo nimite village level te system thakibo lage.
Government scheme to bishi ase, hoilebi etu pura manu logot puncha nai. Policy aru implementation laga gap kom kuribo lage. Infrastructure, awareness, aru accountability bishi lagi ase. Enika hoile he development laga actual benefit grassroots te thaka manu ke bhi punchibo Nagaland te.
Add Comment