KIPHIRE, SEPTEMBER 21 : Nagaland Governor, Shri PB Acharya toh Kiphire District te jaise. Etubi 20th September 2018 te. Etu time te tai District Hospital Kiphire te jaise aro sob Wards te ki-ki saide thakise. Aro tai etu Hospital laga bemar manu kan aro Doctor kan ke kotha kura time te tai sob logot etu Hospital toh bhal te ahkete luijabole karne bhal te mon de kena kam kuribole kuribi koi kena janaise koise.
Tai bi etu Hospital te Staff Quarters aro Manpower kan kinika ase etu kan huthese. Aro tai ke Hospital te ki-ki saman kan batabole karne rasta kan ekdam thik koi kena janaide thakise koise. Aro Tai porabi bemar manu kan ke dennga aro biscuits kan bhak kuridese koise.
Governor bi Zisaji Presidency College te jaise aro Students kan ke kotha kurise. Aro students kan ke tai kan neju laga babuna (careers) ke bhal te mon de kena khetabole kuribi aro husa kebi etu babuna toh babole kuribi koi kena janaise koise.
Etu bejete tai bi alak-alak Tribals Hoho leaders kan, NGOs aro alak-alak Organisation kan ke G.A. Rest House Kiphire te kotha kurise. Aro etu ke etu Tribal Hohos kan pora tai logot etu District toh bhal te ahkete luijabole kuribi aro District Hospital Kiphire toh bhal te banaidebole kuribi koi kena janaise koise. Etubi chulti pora notun Hospital Building banaide kena. Aro tai kan bi rasta bhal nathaka nemite bi saidebole kuribi aro University aro Nursing training Centre kan bi tai kan district te banabole kuribi koi kena janaise koise.
Etu kan sob kotha hune kena Governor pora juwab te sob leader kan ke ahkete ahebole kuribi. Aro neju laga bhal babuna (wisdom) julai kena eke pora kam kuribole kuribi. Aro etu pora Society majutte nahuile tusera kan ki-ki nemite ahkete luijabole kuribi koi kena janaise. Aro Akehda Sangtamlaru thsingmujang (Women Group) kan laga kotha hisabte juwab de kena tai Women Vegetable Marketing khor toh (shed) Kiphire town te banabole karne poisa de kena motub kuri debo koi kena janaise koise.
Etu bejete tai bi Government Higher Secondary School te jaise aro tai kan School Students, parents aro school staff members kan kebi kotha kurise koise.
Kiphire te jai kena 2 din wala kobi 21st September 2018 te Town Council Official aro Business Communities kan logot Kiphire Town Council Hall te kotha kurise. Tai etu time te Rs. 2 lakh poisa toh moila bhela kari kinnibole karne debo koi kena janaise. Aro tai bi tai kan ke tai kan jaka toh sabha-sabhi pora rakhibole kuribi koi kena janaide thakise.
Tai bi etu time te mati kera jaka kan Kiphire Town Mission Compound laga te jaise. Aro tai District Adminsitration ke wall kan bhal te banabole kuribi koi kena janaise koise. Tai bi etu din te Hopongkiu Memorial Hall aro Government High School Yangphi Kiphire te jaise aro kotha kurise. Etu ke tai education kan nemite bhal te ahkete luijai kena thakibole kuribi aro Teachers kan ke neju kam te mon de kena kam kuribole kuribi koi kena janaide thakise koise.
September 21st 2018 te bi Aspiration District aro Disaster/Relief aro Rehabilitaion kan saidebole karne meeting programme manaise. Etu ke DC Conference Hall te Governor PB Acharya logot eke pora. Etu time te Deputy Commissioner Kiphire, Mohammed Ali Shihab IAS pora Welcome note dese. Etu bejete Key Departments kan kobi Health Department Education, PWD R&B, Banking (LDM) kan pora ki-ki khobor laga presentation manaidese aro janaidese koise. Aro etu Programme te Power point Presentation kan bi SDO (C) Sardar pora dekhaidese aro janaidese. Etubi Disaster/Relief aro Rehabilitation, Aspiration District Report hisabte.
Etu Programme te kotha kurikena Governor pora etu District te bhal te botli kuride kena ahkete luijabole karne etu Officers aro Leaders kan ke bhal te mon de kena kam kuribole kuribi koi kena janaide. Aro Kiphire laga manu kan ke kam kura time te thik pora mon de kena aro dukh kurikena kam kuribole kuribi. Aro State Sorkar laga Fund laga oporte hi (depend) thakibole nakuribi koi kena janaide thakise koise.
Add Comment