TUENSANG, SEPTEMBER 10 : Nagaland Governor Shri PB Acharya toh Tuensang District te darek 8, September moina, 2018 te jaise. Aro Tuensang district laga Village Council, Panchayat Hall te meeting manaise. Etu time te tai Council members kan ke kotha kurise. Etu ke tai nahua mousom pora diktar laga chamala ulaidiya time te manu mura kan logot mondukh laga kotha janaide thakise kosie.
Tai bi India desh toh ekta dhuni laga jaka ase. Huilebi India manu kan corruption aro malpractices chamala nemite eman husir nathaki kena aro saidebole nakurikena thaki. Etu pora India manu kan toh dukhiya hi huijai. Aro Development laga naam pora khali kunoba Politicians, NGOs, Contractors aro kunoba manu kan hi lab bai. Aro baaki tusera kan sob toh ene eku lab nabai kena charide koi kena janaide thakise.
Tai bi Nagaland state toh Christian Religion ekta bhal laga kotha ase. Aro tai bi Christian Missionaries kan toh India te ekta Education laga Pioneers ase koi kena janaise. Etu karne Christian laga principal, kobi eke nesena hisabte ekjun-ekjun logot sai kena (brotherhood and look equally) thakibo lagi. Aro Churches kan aro lekha-bura manu kan ami kan Society toh ahkete bhal te luijabole kuribo lagi koi kena janaide thakise.
Tai bi India desh toh duniya pora sobse dangor Democratic Desha se. Etubi alak-alak chat aro religion kan ekta nemite hi aro hisab te hi melekena thakibole kuri ase koi kena. Aro India desh kan North Eastern State kan logot eke pora ahkete jabole nakurile ekta Developing Desh ase koi kena kobole nabaribo koi kena janaide thakise. Tai bi Naga manu kan besi bhak Metro Cities aro Town jaka te jai kena kam besari bohi kena ase. Aro ekdam dukh pora kam kurikena ase. Aro etu toh sob Nagaland state toh kan thik nathaka porahi (going backward) eneka huijua laga ase. Etubi sob states kan ke eke nesena sorkar julabole diya majutte ami kan state toh sobse komjur wala huijai kena ase koi kena khushi nabaa ekta janaide thakise.
Etu Nagaland Governor bi etu chamala kan nemite jua majutte Government Polytechnic osorte jaise. Aro etu Institution laga students aro Faculties kan ke kotha kurise. Etu time te tai bi etu students kan ke mon de kena aro dukh kurikena kam kuribole kuribo aro dimak kholibole kurikena ami kan society toh bhal te ahkete chulti pora luijabole kuribi koi kena janaise.
Etu bejete sam phale Administrative Officers, Security Agency, Government Officials, Tribal leaders, Chambers of Commerce, Schools Students aro NGOs kan ke lok kurikena meeting manaise. Aro Nagaland etu nahua mousom pora pura diktar kuride kena thaka nemite CM Relief Fund laga naam te poisa chama kurikena motub kuribole kuribi koi kena janaise.
Tai Tuensang te jai kena 2 day hua bejete District Jail, Tuensang laga kebi jaise. Aro etu laga manu kan kotha kurise. Aro ahkete bhal te ahe kena kam julabole kuribi koi kena janaide thakise.
Tai bi District Administration kan logot melekena Kohdi bacha kan laga khor aro Bethel bacha kan laga khor, Tuensang lag ate jaise. Aro etu bacha aro staff kan ke kotha kurise. Aro tai kan logot Isor ke bhoi kurikena thaka manu hobi. Kele etu porahi ami kan society te ahkete luijabole bara ekta hobo koi kena janaide thakise.
Etu 2 din wala sam phale tai bi Changsao Thangjam Setshang (Chang Women Organisation), Navinn Conference Hall te meeting manaise. Aro tai etu chang community kan nemite bhal te ahkete luijabole karne kotha kan janaise. Aro etu oporte maiki kan ke Nagaland Armed Police (NAP) te anedebole kuribo koi kena kotha bhal janaise. Aro etu oporte “Beti Bachao, Beti Padhao” laga naam pora bi kotha kurise aro maiki kan Politic khel te melekena ahkete ahebole kuribi. Aro neju laga biya babuna pora botli huijai kena bhal babuna te ahkete ahebole kuribi koi kena janaise.
Etu Changsao Thangjam Setshang kan kebi etu Governor pora poisa 1 lakh dese. Etu oporte tai bi Hindu-Muslim Community kan Tuensang Town te thaka kan logot CKS Hall te meeting manaise koise.
Add Comment