Headlines

Governor pora “Knowing North East – Knowing Indi” Program suru kuridese

November 1, 2018

DEHRADUN, NOVEMBER 1 : Nagaland Governor, P.B. Acharya toh Chief Guest nemite ekta Programme te jaise aro etu din suru kuridese aro manaidese. Etubi Students’ Experience, Inter-State Living “ Knowing North East – Knowing India” din laga Programme. Aro etu din toh Baba Farid Institute of Technology (BFIT), Dehradun, 31st October 2018 te thakise koise.

Etu din te kotha kurikena Governor PB Acharya pora kunoba manu porahi Culture, Traditions aro chamala kan nemite North East states laga manu kan dukh kurikena thaka jani ase. Aro Northeast states jaka kan toh India laga ekta bhal jaka ase. Etu karne India desh laga manu kan NE jaka laga nahui kena tusera states laga kan North East jaka te jai kena food habits, culture, tradition, living style aro tusera kan janibole kuribo lagi koi kena janaise koise.

Governor PB Acharya porabi Joginder Singh Arora, BFIT Groups of Institution laga Chairman kebi Nagaland state ahe kena etu BFIT laga Branch toh kholidebole matise aro janaise. Kele etu pora Nagaland aro North East jaka laga manu kan ke besi motub hobo aro bhal huijaa hobo koi kena. Tai bi etu Chairman ke etu Student/Faculty Exchange Programme toh manabole kuribi koi kena janaise. Kele etu pora ekjun-ekjun laga Culture aro Tradition kan toh janijaa hobo koi kena.

Etu Programme te bi North East Students kan Dehradun te kitab buri thaka kan kebi neju laga babuna kan janaidebole de kena thakise. Aro etu Programme te bi Organisers aro BFIT Officials kan pora Governor aro tai laga maiki Kavita Acharya ke phul de kena khushi janaise koise.

Etu Programme khotum hua bejete Governor bi Vice President, Neisazo Yashu pora ahkete luijai kena thaka Naga Students Union Dehradun (NSUDD) laga Officer Bearers kan ke kotha kurise. Etu time te students kan ke bhal pora mon de kena kitab buri khotum kuribi aro etu bejete Nagaland te ahe kena Society toh ahkete anedebole kuribi koi kena janaise.

Etu din te Lamp julai diya toh Chief Guest, Nagaland Governor pora mani kena suru kuridese. Cultural performances kan toh Students kan Nagaland, Manipur, Tripura aro Uttarakhand laga kan pora dekhaidese koise.