KIPHIRE, SEPTEMBER 24 : Nagaland Governor Shri PB Acharya toh Kiphire district laga Yayi Bridge aro Phelungre bosti te jaise. Etubi 21st September 2018 te. Etu time te tai bosti manu kan ke kotha kurise. Aro tai tai logot bosti manu kan pora ki-ki chamala nemite kotha janaidiya ke besi bhal pora hune thakise aro tai kan laga dukh ke besi morom kurikena thakise koise. Etu bejete tai bosti manu kan ke Development nemite mati debole kechara nahobi. Aro etu mati debole karne ahkete ahe kena bhal te Development mon mela-mele thakibole kuribi koi kena janaide thakise.
Kiphire district laga Yayi dolong bi etu sal July moina phale pani besi kera time te pani bhorta huikena bhangaidese aro biya kuridese. Etu karne Governor pora etu dolong banabole karne bi poisa Rs. 50,000 dedese koise.
Governor bi Phelungre bosti te jaise. Aro etu bosti toh Kiphire District bitorte sobse purana bosti ase koise. Aro Governor logot meeting mana time te bosti manu kan pora tai ke 2003 sal te Assam Rifles kan ke mati dediya chamala nemite bhal te saidebole kuribi koi kena kotha janaide thakise koise. Aro tai kan bi Governor ke ki-ki banabole thaka kan sob chulti pora banabole suru kuride bi koi kena janaise koise. Etu bejete Governor pora tai kan ke ekta Power Generator dedese koise.
Add Comment