Gujarat High Court para ‘Maharaj’ film laga release ke rokhaidisey

New Delhi, June 14: Aamir Khan laga sobsey dangor chokra Junaid laga first film Maharaj te rukhawat ahijaisey. Report hisap te, ekta Hindu Group para request kora picheyte Gujarat High Court para etya etu film laga release ke rokhaikina rakhisey. Etu Hindu group para dawa kurisey ki etu film para larayi jhagra olaidibo parey. ‘Maharaj’ film te Jaideep Ahlawat bi asey aro etu ke Siddharth P Malhotra para direct kurisey. Etu report para koisey ki “film laga release ke rokhabole laga order tu Lord Krishna laga bhakt aro Vallabacharya laga followers laga behalf te ekta petition file kora nimitey issue kurisey”. Petition file kora laga karon tu etu thakisye ki etu film, kuntu te 1862 laga Maharaj Libel Case laga kahani dikhai etu para public order ke bhangaidibo aro  Vallabacharya laga followers laga khilaf te larayi jhagra olaidibo. Aro koisey ki etu film te Lord Krishna aro puja path laga gana khan laga khilaf te insult kora laga comment dikina asey. Etu complaint te enaka bi koikina asey ki etu film tu bhal para promotion nukurikina aro ekta trailer bi nidikhaikina release kuribole plan kuri asey, taki etu kahani laga bari te manu khan eman janibo naparibo. Etu mamla te hearing tu June 18 te hobole asey.