Mumbai, March 11: Purana aro mashoor rock band Guns N’ Roses para announce kurisey ki taikhan tu May 2025 te India te perform kuribole asey. Etu band para etu announcement tu taikhan laga instagram page te etu caption logotey kurisey, “Amikhan India te ahi-asey! Etu toh special hobole asey.”
Etu band tu Mumbai laga Mahalakshmi Racecourse te May 17 te perform kuribole asey. Ticket khan tu Kotak Mahindra Bank laga customer khan nimitey March 17 te 12 pm para available hobo. Hoilebi general ticket laga sale(bikri) tu March 19 laga 4pm para suru hobo. BookMyShow para etya ticket price tu Rs 4999/- dikhai-asey, kuntu toh booking suru huwa picheyte change hobo parey.
Guns N’ Roses tu India te second bar ahibole asey. Taikhan laga first performance tu 2012 te hoisiley. Frontman Axel Rose tu Slash, Dough McKagan, Richard Fortus, Frank Ferrer aro Mellisa Reece logotey perform kuribole asey, kun khan 1996 te nijor-nijor rasta te jaisiley aro 2016 te etu band te wapas ahisey.
Guns N’ Roses, kuntu toh “Sweet Child O’ Mine”, “November Rain”, aro “Don’t Cry” nimitey mashoor asey, etu toh 1985 te form hoisiley. Etu band para taikhan laga first Album, Appetite for Destruction tu 1986 te release kurisiley. Utu homoitey taikhan tu Geffen Records logotey sign hoikina thakisey.
Guns N’ Roses para India te kuribole thaka concert tu taikhan para ekta dangor world tour announce kora laga hisa thakisey, kuntu toh South Korea para suru hobole asey. India tu taikhan laga third destination asey. Etu concert tu BookMyShow Live para LiveNation logotey milikina produce kuriasey.
Add Comment