Guwahati laga HC para Assam govt ke notice issue kurishey

Assam, sep 17: Guahati High Court para Monday de Assam government aro officials khan ke notice ekta dishey. Jintoh rape case laga suspect ekta tai khan laga custody de murijaishey August 24 de, edu khota de bhal jawab ekta mangishey. Mura manu laga baba para koi asey ke police khan galti manu ke under loi jaikina muraidishey koi kina. Edu baba para police khan laga opor de bodnam kuri asey ke tai khan hosa laga biya manu ke nahoi kina, galti manu ke under de loi jaishey aro tai khan laga haat para hi muripo dishey enika koi asey.  Edu mura manu toh Assam laga Dhing minor rape case laga suspect takishey. Edu baba laga petition de taka naam khan toh – Assam Director General of Police (DGP), Principal Secretary,   Police Nagaon laga Superintendent , District Commissioner Nagaon, aro case laga in charge khan. Tai laga petition de koishey ke tai khan government ke bishi par post-mortem laga kakos aro death certificate khan depoley hotishey hoilepi eku paa nai koishey. Aro edu mura manu laga ama baba khan toh tai ke Dhing laga rape case nemedey loi jaishey koi kina janey taka nai koishey. Advocate Khalid para edu khota de bhal para investigate kuripoley mangishey aro mura manu laga family nemedey compensation pe mangishey.