Hardik Pandya ke IPL Code of Conduct bhanga nimitey warning disey

New Delhi, March 30: Mumbai Indians laga captain Hardik Pandya ke tailaga team para Saturday din te Narendra Modi Stadium te Gujarat Titans laga against te IPL match chulithaka homoitey ekta slow over-rate maintain kora(taikhan laga overs complete kuribole nimitey dikina thaka homoi para bisi kuwa) nimitey fine impose kurisey. Etu  toh IPL laga Code of Conduct laga Article 2.2 te tailaga team laga etu season laga first golti thaka nimitey Pandya ke Rs 12 lakh laga fine mangisey. Saturday din te Prasidh Krishna aro Mohammed Siraj para lead kora Gujarat Titans para Narendra Modi Stadium te IPL 2025 laga Match 9 te 36 run para jita picheyte Mumbai Indians tu etu season te second bar harisey.  Hardik Pandya tu IPL 2025 season laga first match kuntu Chennai Super Kings (CSK) laga against te thakisey, etu khelanai kilemaney tai suspend hoikina thakisey. Tai tu IPL 2024 te Lucknow Super Giants laga against te match khela homoitey ekta slow over-rate offence nimitey suspend hoisiley. Tai nathaka nimitey, Mumbai Indians tu CSK laga against te bhal score kuribole paranai aro etu match tu 4ta wicket para harijaisey. IPL 2025 te ekta captain para slow over-rate fine pa tu etu first time asey. Titans para Mumbai Indians ke 36 runs para haraidibole nimitey ekta complete team performance dikina IPL 2025 laga first jeet hasil kurisey Mumbai Indians, kun etya etu season laga ekta bi match nijitikina asey, etu team tu Monday te Wankhede Stadium te  defending champions KKR laga samna kuribole asey. Hardik para match harija picheyte enaka koisey, “Ami hisap te batting aro bowling te amikhan duita jag ate bi 15-20 runs para nupungchikina thakisey. Amikhan field te professional thakanai, amikhan para mamuli golti kurisey aro etu nimitey amikhan 20-25 runs gawai disey aro ekta T20 game te etu bi bisi asey. Gujarat Titans para bisi bhal batting kurisey. Taikhan bisi bhal para khilisey, taikhan ean chance luwanai, taikhan ki thik asey etu kurisey, taikhan eman risky shot nikhilikina bi runs pabole parisey.”