February 24, 2025, 05:53 PM: 8 saal laga Ajay koi kena thaka hari jai kena thaka toh Assam tey para pai loishey, February 23rd, 2025 tey. Itu chukra Ajay koa toh hoiley Old Showuba, Niuland tey para harai kena thakishey, February 20th tey. Ajay toh hoiley tai laga Ama logotey Borpathar Police Station, Karbi Anglong, Assam tey para lok paboley parishey, February 23rd tey.
Itu chukra key, Assam laga Gautam Bosti laga auto driver para paishey, February 20 tey aru tai para Bosti laga Council ke chukra ke di dikena thakishey, koishey.
Ghor malik para koishey, council para toh hoiley Ajay ke, police ke di diboley laga thakishey, hoilebi chukra toh hoiley polai jai kena thakishey. Koishey, tai khan toh hoiley flyer khan whatsapp para share kurishey, police ke, Bokajan & Shantipur area khan tey.
Karbi Anglong laga Student Union khan para Ajay ke Borpathar Police Station ke di dishey.
Formality khan thik thak kuria pichetey, Ajay ke tai laga ghor tey wapas loi kena anishey.
Itu Ajay koa bacha para koa laga hisap tey, tai koishey, tai tai-laga ama ke miss kurishey & itu nimitey tai nijey para hey Mokokchung tey ekla wapas jaboley kuri thakishey, tai ke rakha laga ghor malik para koi thakishey.
Add Comment