Hijab-lagai thakia mahila ke din dey attack kurishey UK dey.

UK, 26 October : Ekta video internet dey ulaishey kutey ekta hooded mota UK dey ekta Muslim mahila ke din dey attack kuria dikhi pai ekta racist attack shaak kurina, Metro report kurishey. Itu ghatna laga ekta video kuntu viral jaishey tatey ekta mahila hijab lagauna Dewsbury, West Yorkshire laga raasta dey khara kuri thakia dikhai Tuesday dey. Seconds piche dey, ekta hooded mota tai ke charge kurina ahey aro ekta concrete slab tai laga maatha dey phikai. Thankfully, itu mahila tatey para hadiwo parey. Tai itu attacker para pulaina uthi thakia manu tuita laga osor jaa dikhiwo parey.

Ekta X user para itu video share kurishey aro likhishey ”Itu toh bishi bhayanak asey- ekta hijab-lagai thakia Muslim mahila ke tai laga maatha dey concrete slab ekta phikaishey ekta white man para Dewsbury, West Yorkshire dey.’

Tai laga mota Eid Karimi kuishey The Independent ke,”Mui pitor dey khana luwoley jaishey aro tai bahar dey rukhi thakiboley taay kurishey tai logot umbrella thakia karoney. Ajanak para mui manu pulai thakia dikhishey aro itu mota. Tai pulawoley kosis kurishey huilewi mui tai ke khitaishey aro dhuri luishey. Tai chilai thakishey ‘Police ke namadiwi, mui aro itu nakuribo.’ Muikhan taike luina police ahiwoley rukhi thakishey. Tai jaani thakishey tai diktari dey asey kuina.”

Juti tai eku jokhum huanai, tai ”shocked aro stressed aset”, Tai laga mota halishey.

Bishi internet julai thakia manu khan video dikhina asturit thakishey aro mahila toh thik thakia bisas rakhishey.

Ekta user para likhishey, ”Appalling. Bisas asey tai thik hi asey.” Alag ekta likhishey, ”Itu toh eman bhayanak asey. Ki laga duniya asey kutey muikhan alag hua embrace nakurey aro ekjun ekjun para nashikey, kintu chutu muun thakia bigots aro racists para eman nafrat kurey. Mui bisas rakhi asey ki itu mahila thik hi asey.”

Ekta West Yorkshire Police spokesman para maana kurishey juti itu attack toh ekta hate crime nishina treat kuri asey na nai. Tai kuishey, ”Muikhan itu video laga janey aro residents ke janai diwo muun asey ki itu nishina ghatna toh bishi serious para lui. Ekta mota ke itu offence laga connection dey arrrest kurishey aro Kirklees Police para enquiry juli asey.”