Guwahati, January 17 : Assam laga Chief Minister Himnata Biswa Sarma para koisey ki tai para January 18-19 te Assam laga upper district te poila para kuribole fix kurikina thaka programme khan tu cancel kuridibole asey taki etu area khan te Congress laga Bharat Jodo Nyay Yatra laga event logotey taikhan laga program crash nohobo.
Himanta Biswa Sarma para etya Congress yatra logotey clash nohobole nimitey Majuli te kuribole thaka tailaga programme tu postpone kuridisey aro Jorhat aro Deragaon te ration card bhak kora laga event bi cancel kuridisey.
Tai para etu bi koisey ki etya manu khan tu Congress laga public gathering aro meeting khan attend kuribole sorom khaikina asey.
CM Sarma para koisey, “Rahul Gandhi laga yatra laga tarik tu amikhan para ekta nutun scheme nimitey form bhak kuribole laga tarik logotey ekey din te giri asey.
Sarma para press conference te koisey ki etu tarik khan tu amikhan para tai(Rahul Gandhi) ahi asey koikina janibole ageyte declare kurisiley.
Congress para utu district aro aas paas laga area te busti laga maiki khan nimitey nutun announce kora scheme laga form bhak kora tu enaka homoi te fix kurisey ki etu tu Congress laga Yatra planning kora logotey clas hoijabo koikina iljam laga tu hosa nohoi koisey.
Sarma para koisey, “Ulta ekta gesture nisna, ami para January 18 te thaka amikhan laga Majuli programme ke cancel kuridisey taki etu tu Rahul Gandhi laga event logotey clash nohobo. Majuli tu ekta chutu district asey aro ami para district administration ke muskil te dhalibole mon nai.”
Tai para jor dikina enaka koisey, “Etu laga opor te ami para aro adjust kuribole naparibo. Ami para ek moina ageyte January 18 aro 19 te upper Assam te kuribole announce kora sob programme tu cancel kuridisey. Apni khan para etu para bisi dangor-mon thaka sarkar napabo.”
Union Home Minister Amit Shah para rajya te January 20 te rajya visit kuribole propose kurisey hoilebi etu programme tu etya tak bi fix huwanai koisey.
Assam Chief Minister Himanta Biswa Sarma para etu iljam bi lagaisey ki Congress laga yatra para Hindu laga against te ja laga saath di asey. Tai para enaka koisey, “ Apnikhan(Congress) tu anti-Hindu(Hindu dhorm laga khilaf) asey aro amikhan tu Hindu laga sath te asey …Hoilebi, amikhan tu anti-Muslim nohoilebi anti-Christian bi nohoi nahi eku community laga khilaf te asey.”
Add Comment