Hina Khan tu stage 3 breast cancer para diagnose hoisey

New Delhi, June 28 : TV actress Hina Khan, kun ‘Yeh Rishta Kya Kehlata Hai’ te tailaga role nimitey popular asey tai Friday din te tailaga instagram post te share kurisey ki tai stage 3 breast cancer para diagnose hoikina asey. Tailaga instagram handle te jaikina tai para ekta statement issue kurikina fan khan ke koisey ki tai etu musibat laga samna kuribo. Aro etu musibat para aro bi tagra hoikina olabole nimitey ki parey sob kuribo. Tai para etu instagram post te koisey ki tai sob manu ke etu kobole mon asey ki tai tu thik asey. Aro etu bimari para jeetibole nimitey tai tagra, determined aro pura puri committed asey. Tailaga treatment tu already suru hoijaisey koisey. Hina para tailaga fans khan ke enaka mushkil homoitey privacy nimitey request kurikina koisey, “Ami para etu homoitey morom kurikina apni khan laga respect aro privacy mangi asey. Ami pura mon para apni laga morom, taka taro asirvad diya tu khusi paia sey. Ami etu bimar para bhal hobole laga tarika bisara laga journey te thaka homoitey apni khan laga personal experience, enaka bimar paikina bhal hoija laga kahanai aro suggestion paisey koile bisi khusi hobo. Ami, amilaga parivar aro morom thaka manu khan logotey dhyan dikina, hosla thakikina aro positive hoikina thaki asey. Isor laga morom para amikhan biswas kuri asey ki ami etu musibat para bahar olabo aro pura puri healthy hoijabo. Morom kurikina apni laga prathana, asirvad aro morom pathaidibi.” Tai para etu post share kora picheyte bisi fans aro television industry para tailaga close friends khan para etu news te react kurisey. Hina Khan tu Indian serial te ekta popular naam asey. Tai tu Yeh Rishta Kya Kehlata Hai, Kasautii Zindagii Kay aro Naagin 5 nisna mashoor TV serial kurisey.