India: 24 gonda te 43,654 cases, 640 mora khobor

July 28, 2021. India te 24 gonda pithor te 43,654 notun novel coronavirus cases thurishe aro etu oper te bemari para 640 manuh mora khobor paishe. Union Health Ministry para data shared kora hesab te, India te 24 gonda majot sob melaikena 47,240 neshina discharge hoishe, etu melaikena desh te bemar bhal howa toh 2,97,99,534 ase koishe. India te sob melaikena COVID-19 bemar cases toh 3,06,63,665 te othikena ase aro 4,59,920 active cases ase koikena data para janaishe. Sob melaikena India te bemari para 4,04,211 neshina morikena ase koishe. Itya dak India laga jaga sob te 36,13,23,548 manuh khan logot vaccine thikena ase. Jowa saal August moina te India te COVID-19 tally toh 20 lakh pongchise, etu beche August 23 darik te 30 lakh cases hoikena September 5 darik te 40 lakh hoishe aro September 16 darik dak te cases toh 50 lakh hoishe. Etu hoikena September 28 darik dak te 60 lakh pongchise aro October 11 darik dak te 70 lakh, October 29 darik te 80 lakh hoikena November 20 darik dak te 90 lakh para jowa saal December 19 darik dak te 1 crore pongchise. Etu samai, External Affairs Minister S Jaishankar para koishe ke, India toh itya coronavirus bemari second wave para bahar olai ase aro global economy te besi tangor economic recovery hoikena jaboli ase koishe. Indo-Pacific business summit samai inaugural session te virtual address kora samai tai para koishe ke, India toh bhal wala hoikena business aro supply chains toh pulai neshina bhal hoikena jabo koishe. Tai para aro janaishe ke, Indo-Pacific para “activity aro energy” hoikena globalization te rebalance hoikena jaboli kam koribo koikena Jaishankar para janaishe.