Saturday, November 1 – India laga defence aru space capacity bishi strong bana bole, Indian Space Research Organisation (ISRO) kali launch kuribo ekta heaviest communication satellite, CMS-03, Saturday 5:26 PM te Satish Dhawan Space Centre, Sriharikota para. Launch toh hobo Launch Vehicle Mark-3 (LVM-3) para, juntu “Bahubali” bhi koi kina jani jai, karon etu rocket bishi powerful aru ekdom successful ase.
CMS-03 satellite, juntu weigh kori ase laga 4,400 kilogram, etu banai dishe Navy laga maritime communication aru surveillance network strong banabo karone. Etu replace kuribo GSAT-7 (Rukmini) ke, juntu 2013 para India Navy laga main communication line ase. Orbit te jai pichete, CMS-03 secure aru fast communication link dibo Navy laga ship, submarine aru aircraft karone, juntu operate kure 2,000 kilometre tak India laga coast para.
Etu launch hobo LVM-3 rocket laga aath number mission, aru etu same rocket age Chandrayaan-3 ke Moon te successfully launch kori dishe. 43.5 metre height aru 642 tonne weight thaka etu rocket hoishe India laga most powerful launch vehicle, juntu heavy payload orbit te uthai jabo pare.
ISRO official khan eneka koi ase, CMS-03 launch toh defence communication karone important ase, aru etu India laga self-reliance space technology te ekta baro step. Jodi etu launch successful hobo, India aru ekta strong position loi jabo global space aru defence sector te.
LVM-3 laga human-rated version bhi use hobo Gaganyaan mission karone, juntu te India laga astronaut khan space te jabo. CMS-03 launch logote, ISRO India laga space technology aru national security ke ekdom strong bana rahi ase — etu Atmanirbhar Bharat direction te ekta dangor kadam ase.
Add Comment