Indian-origin Kash Patel tu Friday din te Federal Bureau of Investigation (FBI) laga ninth director huwa laga kosom khaisey. Tai tu Hindu laga holy book Bhagavad Gita ke chuikina kosom khaisey. Tailaga kosom kha laga ceremony tu US Senate para taikey FBI director confir kora picheyte US laga Eisenhower Executive Office Building te hoisey.
Kash Patel laga girlfriend aro family members khan bi etu ceremony te mojud thakisey. Taikey US Attorney General Pam Bondi para kosom kha te lead kurisey. Tai Christopher Wray laga jaga loisey.
Kash Patel tu enaka dangor position te aha picheyte Gita ke chuikina kosom kha first India-American nohoi. Ageyte, Congressman Subhash Subrahmanyam bi Gita ke chuikina kosom khaisiley.
Kash Patel para Federal Bureau of Investigation (FBI) laga director huwa tu tailaga jibon te sobsey dangor somman laga kotha asey koisey.
Tai para etu bi koisey ki tai American dream te thaki thakisey. Aro enaka koisey, “kun manu khan para American dream tu murikina asey koikina bhabna kuriasey, yatey sabi. Apni khan ekta first-generation Indian ke kotha kuriasey kun prithivi laga sobsey dangor desh laga law enforcement agency ke lead kuribole asey. Etu toh dusra kotey bi hobo parey.”
Patel para FBI bhitor te mondikina kaam kuribole laga bi commitment kurisey aro kosom khaisey ki etu federal agency laga bhitor aro bahar duita te bi accountability thakibo.
US President Donald Trump para Patel laga kosom kha laga ceremony hobole ageyte reporters ke kotha kora homoitey enaka koisey, “Ami hisap te tai tu etu position te sobsey best hobo.” Aro koisey ki FBI agents khan para taikey bhal lagey.
Add Comment