India para Asian Shooting Championship lead korise

Kazakhstan, 26 August : India etiya 50 medal mark cross kori loise aru Shymkent, Kazakhstan te choli thaka 16th Asian Shooting Championship te medal tally te lead korise. Mahila trap event te, Neeru Dhanda 43 hits loina gold jiti loise, Qatar laga Ray Bassil silver loi thakise aru India laga Aashima Ahlawa bronze loi thakise. Neeru aru Aashima, Preeti Rajak logot milaikena, team gold bhi India ke jitai dise, China aru Kuwait ke pichete chari dise. India laga junior mahila 25m pistol event te pura podium sweep korise: Payal Khatri gold loi loise, Naamya Kapoor silver aru Tejaswini bronze loise. Itu team, Riya Shirish Thatte milaikena, Korea laga pichete silver loise. Men’s trap event te, Bhowneesh Mendiratta silver loi loise, China laga Qi Ying laga piche thakise. Senior mahila 25m pistol te, Manu Bhaker fourth finish korise aru Esha Singh sixth. Tai khan Simranpreet Kaur Brar logot team up kori, team event te bronze loi dise. Competition laga tin din baki thaka te, India medal standings te lead korise: 29 gold, 11 silver aru 14 bronze.